Estadu Avalia Planu Seguransa Eleisaun Parlamentár

0
44
Xefe Governu halo enkontru ho ulun boot defeza no seguransa hodi halo preparasaun ba eleisaun parlamentár. Foto GPM

DILI, (TATOLI) – Primeiru Ministru, Rui Maria de Araújo iha segunda (10/4) bolu Ministru Interiór, Longuinhos Monteiro no Ministru Defeza, Cirilo Cristovão halo avaliasaun ba planu seguransa iha eleisaun parlamentár.

Ohin ne’e PM bolu mai enkontru ho responsavel ba área seguransa, defeza nomos informasaun nian, atu halo avaliasaun ba seguransa eleisaun lejislativu mai ne’e”, Ministru Interiór, Longuinhos Monteiro ba jornalista iha Palásiu Governu.

Governante ne’e realsa komando PNTL no FALINTIL-FDTL preparadu hodi fó seguransa iha eleisaun lejislativu.

Iha enkontru ne’e, Xefe Governu mós kontinua bolu atensaun ba ministru interior atu kontinua fó atensaun ba sirkulasaun sidadaun estrangeirus ne’ebé tama no sai área Timor-Leste hodi prevene atividade droga no trafiku úmanu.

“Primeiru Ministru  husu atu halo kontrola di’ak liutan  ba fronteira sira iha Timor nian hotu, atividade ba sirkulasaun karik iha tendénsia ba trafiku úmanu  hodi asegura  seguransa iha eleisaun lejislativu”, tenik.

Alende ne’e, lider Governu ne’e husu mós ba Ministru Interior atu  hala’o levantamentu dadus kona-ba atividade  komersiu ilegál  ne’ebé oras ne’e sirkula iha rai laran.

Jornalista: Agapito dos Santos

Editora: Rita Almeida

HUSIK IDA HATÁN