Esplorasaun Onshore Sei Emprega Timoroan 90 %

0
396
Diretora empreza Timor Resources, Suellen Osborne. Fptp/António Gonçalves.

DILI, (TATOLI)- Programa esplorasaun onshore ka rai-maran entre Timor-Leste ho Timor Resources sei hahú imediata no ekipa esplorasaun porsentu 90 sei emprega ema Timoroan.

Iha selebrasaun Contrato de Partilha de Producão (CPP) onshore, Diretora Timor Resources, Suellen Osborne informa, liuhusi asina kontratu ne’e marka pasu boot ida no hein katak sai parseiru ne’ebé naruk no susesu ba Timor Gap ho Timor Resources, importante liu ba povu Timor-Leste.

“Ohin (Sesta, 07/04/2017) mak inísiu husi kontratu ba parseria naruk iha Timor-Leste. Nepean (inan husi empreza Timor Resources) iha vizaun ba longu prazu ba projetu ne’e. Ita asina ona Kontratu Partilla Produsaun Onshore ba esplorasaun tinan hitu no permite ba produsaun tinan 20. Ita-nia ekipa tékniku sei lidera husi señor Mike Bucknill ne’ebé iha kolaborasaun másimu ho Timor Gap,” nia hato’o.

Nia kompromete katak esplorasaun onshore ne’e sei kumpri reponsabilidade ho forma ambientál. Saúde no seguransa sai númeru ida ba sira-nia organizasaun, no ida ne’e importante tebes.

“Ami sei minimiza impaktu ba ekosistema iha prátiku kampu petrolíferu no jestaun projetu klase mundiál, lori teknolojia foun ba otimizasaun posu no inovasaun atu garante no mantein lisensa ba operasaun, liuhusi kuidadu  ba jestaun materiál esplozivu no foku ba reabilitasaun rai depois operasaun. Ami sei dezenvolve atividade parseria ativu ho komunidade lokál,” hatete miss Austrália iha tinan 1998 ne’e.

“Ami fiar ida ne’e mak oportunidade era osan-mean nian  ba Timor-Leste no bainhira suporta husi programa sosiál ne’ebé Governu hahú ona,” katak nia iha otél Novo Turismo.

Mikroekonomia Timor-Leste ladún forte no investimentu iha esplorasaun ne’e, enkoraja konfiansa katak iha dékada daruak tuirmai, Timor-Leste sai nasaun denzenvolvidu, independente prósperu, sustenta nesesidade  nia populasaun rasik no dinamiza poténsia husi forsa foinsa’e.

Nune’e mós iha futuru sei fornese oprtunidade atu halo progresu signifikativu ho dezafiu boot ida ne’ebé Timor-Leste enfrenta  atu hamenus pobreza. Ida ne’e la’ós tenke sai papél Governu nian maibé halo  absolutamnete  parseria ho empreza sira.

Suellen afirma, iha Nepean Group liuhusi empreza Timor Resources, sei fó onra ba kopromisu servisu komunitáriu nomós konteúdu lokál. Sei esforsu atu intromete moris povu Timor-Leste nia liuhusi servisu, edukasaun, programa edukasaun ba agrikultór rejionál ka dezenvolvimentu subsisténsia rurál no programa moris sustentavel ne’ebé sei implementa iha parte husi konteúdu lokál iha área rejionál besik atividade esplorasaun.

“Husu imi-nia apoiu, espesialmente ba parte divizaun ministeriál ida-idak atu garante katak ami submete programa ne’e iha tempu ne’ebé sertu. Lojistikamente ita sei hetan dezafiu tanba terrenu, infraestrutura no iklima atu kompleta etapa ba esplorasaun”, nia dehan.

Governu iha ona vizaun atu iha survei airbone husi lidar,  gravidade no magnétiku. Ida ne’e sei fó ideia ne’ebé provoka no aselera esplorasaun rekursu petróleo no minerál. “Ita espera bele asesu ba data ne’e, ne’ebé permite ita hahú sísmika iha tinan 2018 tempu bailoro”.

Jornalista: Maria Auxiliadora / Editor: Gantry Meilana

HUSIK IDA HATÁN