ME Esklarese Polémika KNE ba Primeiru Ministru

0
171
Ministru no vise-ministru I ho II, Ministériu Edukasaun hasai foto hamutuk ho Primeiru-Ministru, Rui Maria de Araújo hafoin enkontru serbisu, iha Palácio do Governo, Segunda, (3/4). Foto GPM

DILI, (TATOLI) – Ministru Koordenadór Asuntu Sosiál no Ministru Edukasaun, António da Conceição hamutuk ho Vise-ministru Edukasaun I, Dulce de de Jesus ho Vise-ministru II, Abel da Costa Ximenes hasoru malu ho Primeiru-Ministru, Rui Maria de Araújo, Segunda ohin iha Palásiu Governu hodi esklarese polémika entre Ministériu Edukasaun (ME) ho Primeiru Ministru relasiona ho Konferénsia Nasionál Edukasaun (KNE) foin lalais ne’e. 

Polémika ne’e mak, ME bainhira realiza Konferénsia Nasionál Edukasaun (KNE) nian kona-ba: “Educação é o pilar importante para o dezenvolvimento” durante 22 no 23 Marsu 2017, Xefe Governu la partisipa iha konferénsia ne’e, ne’ebé ikus mai rezulta sai isu iha mídia nasionál sira.

“Ami na’in tolu mai. Ha’u mós tenta halo filafali klarifikasaun ida kona-ba situasaun ne’ebé media fó sai liu ba ne’e”, António da Conceição esplika ba profisionál komunikasaun sosiál sira.

Maske nune’e, nia informa, PM la tau ba kestaun katak la-konvida nia nu’udar problema boot ida embora ne’e étika ne’ebé presiza atu hatene, haree vantajen no desvantajen husi ne’e, atu bele haree hodi dehan di’ak mak marka prezensa ne’e ka iha vantajen ruma.

“Ida ne’e, mós mai klarifika liliu kona-ba lian materna ne’e,” haktuir.

Pratikamente atu serbisu efetivamente mak Abril no Maiu, hanoin prioridade saida mak ME sei halo, sei dezenvolve iha fulan rua ne’ebé sei restu ne’e tanba Juñu pratikamente ema ba ona atividade kampaña.

“Tanba ne’e, Primeiru-ministru fó hanoin mai ami hodi tau netik prioridade ruma iha fulan rua ne’e liliu atu hatudu netik buat di’ak ruma ne’ebé ami halo tiha ona hodi konvense mós sosiedade katak la’ós notísia la di’ak de’it maibé notísia di’ak mós”, akresenta.

Husu kona-ba prioridade saida mak sei hala’o durante fulan rua ne’e nia laran, Ministru informa diretór sira sei hala’o hela reuniaun ida para bele tau iha segundu trimestre.

Enkontru servisu ne’e halo tuir kada ministériu mai informa, atualiza ba PM kona-ba serbisu ne’ebé mak Ministériu Edukasaun halo ona.

Tuir informasaun husi Gabinete PM, hasoru malu ne’e atu klarifika ba públiku kona-ba pozisaun ME relasaun ho kestaun introduz lian materna, ne’ebé hamosu mós polémika iha públiku iha semana hirak liu ba.

Jornalista: Rafy Belo

Editora: Rita Almeida

HUSIK IDA HATÁN