Ensinu Superiór Haat Hato’o Ona Proposta ba ME Loke Mestradu

0
169
Logotipu sira. Ilustrasaun

DILI, (TATOLI) – Ensinu superiór haat iha Timor-Leste (TL) hato’o ona proposta ba Ministériu Edukasaun (ME) atu loke kursu mestradu iha área oioin tuir nesesidade.

Ensinu superiór sira ne’e mak hanesan UNTL (Universidade Nasionál Timor Lorosa’e), UNDIL (Universidade Dili), DIT (Dili Institute of Tecnology) no IOB (Institute of Business).

Vise Ministru Edukasaun II, Abel da Costa Ximenes. Foto Tatoli: Rafy Belo

Vise Ministru Edukasaun II, Abel da Costa Ximenes informa katak proposta ne’e tékniku ANAA (Agência Nacional para a Avaliação e Acreditação Acadêmica) halo hela estudu.

“Primeiru-ministru mós fó ona orientasaun para di’ak liu ba Timor tenke iha programa mestradu”, informa iha ME Vilaverde, segunda (24/4).

Hatutan tan: “Antes governu foun toma pose, programa mestradu bele la’o ona iha Timor”, akresenta.

Hatan ba pergunta ajénsia Tatoli, kona-ba konteúdu husi proposta liliu kona-ba área saida mak ensinu superiór sira ne’e sei loke, governante ne’e hatan, balun ba área edukasaun, ekonomia no jestaun, direitu no jestaun inklui seluk tan. “Agora idaidak tenke tetu, sukat rekursu umanu ne’ebé disponível”, katak tan.

Instituisaun akadémiku sira ne’e atu hanorin mestradu tenke iha kualidade rekursu umanu ne’ebé ho grau akadémiku doutoramentu no iha formasaun lineár. “La’ós doutoramentu ne’ebé mak arbiru de’it”, salienta.

Nia fó ezemplu, ema ne’ebé atu hanorin jestaun; lisensiatura, mestradu no doutoramentu tenke jestaun. “Depois iha ona ano (tinan-red) esperiénsia. Hanorin pelumenus tinan haat, tinan lima, foin mak akreditadu hodi bele hanorin programa mestradu”, esplika.

Tuir mai, programa ida labele ema ida ka rua de’it maibé liu lima, neen, hitu no seluk tan. “Ami mós fó ona sujestaun atu sira bele rekruta tan profesór husi Austrália, Malázia, Indonézia no husi nasaun seluk tan para mellora kualidade formasaun ensinu nian”, afirma.

Governante ne’e konklui katak Nasaun ne’e iha ninia rekursu kualifikasaun doutoradu 50 resin, bele duni fó formasaun ba mestradu sira.

Jornalista: Rafy Belo

Editora: Rita Almeida

HUSIK IDA HATÁN