Ema Nain 21 Mate Tan Asidente Hosi Janeiru-Abril

0
70
FOTO MEDIA PNTL

DILI, (TATOLI) – Komandante Jerál Polísia Nasionál Timor-Leste, Júlio Hornay relata katak iha tinan 2017 hosi fulan-janeiru to’o loron 6 fula-abril ema hamutuk 21 mak mate tanba kauza hosi asidenti tránzitu.

“Ema mate nain 21, kanek kma’an 525 no todan 103 hosi totál asidenti 500”, Komisáriu Júlio Hornay informa liuhosi konferénsia imprensa iha Kuartel Jerál PNTL Kaikoli, kinta (13/4).

Atu asegura, hahú loron ohin ba oin, PNTL sei halo cek point ba iha fatin-fatin sira importante ba sasan kroat no pasajeiru sira ne’ebé sa’e transporte públiku tur iha kapón leten ou tara-án iha odamatan.

Bainhira iha servisu auto-stop ne’e mak hetan pasajeiru sira tara-án iha kareta no túr iha kapón leten, PNTL sei hatun no fó sansaun ba kondutór sira.

Ba seguransa loron paskua nia, PNTL sei manten koordenasaun ho instituisaun FALINTIL-Forsa Defeza Timor-Leste, liu-liu iha planu operasaun.

“Komando hasai ona dirativa ba komandu munisípiu sira atu asegura paskua ne’e bele la’o ho di’ak”, realsa.

PNTL ho Polísia Militár mós sei halo patrollamentu hamutuk iha teritóriu. Husu ba juventude atu hakmatek, nune’e kontribui ba estabilidade no pás, liu-liu iha loron paskua.

Jornalista: Manuel Pinto

Editora: Rita Almeida

HUSIK IDA HATÁN