Eleisaun Parlamentár, Governu Hanoin Ona Timoroan Iha Korea no Inglatera Bele Vota

0
52
Eleitor ida tau hela tinta ba nia liman fuan hafoin vota iah Eleisaun Prezidensial 20 Marsu 2017. Photo: TATOLI / Antonio Goncalves

DÍLI,(TATOLI)- Ministru Estadu Koordenador ba asuntu administrasaun estadu no justisa nomos Ministru Administrasaun Estatal, Dionísio Babo hateten, iha posilidade governu sei estabelese sentru votasaun ba sidadaun Timor Oan sira iha Korea do Súl no Inglatera hodi partisipa eleisaun Parlamentár nune’e bele vota.

ʺPosibilidade iha, maibe ami sei hare’e buat tolu, primeiru konaba orsamentu, preparasaun tekniku liliu rekursu umanus no ikus tenki halo prosesu resensiamentu no aktualizasaun dadus,ʺ dehan Ministru Deonísio Babo ba Jornalista Sira iha Parlamentu Nasiónal Segunda (17/04/2017).

MAE sei kordena ho Comisaun Nasionál Eleisaun (CNE) no Sekretariadu tekniku Administrasaun Eleitorál (STAE) hodi hare’e ba planu ne’e.

Ministru Negosiu Estrangeirus no Koperasaun, Hernani Coelho hateten, nia parte prontu atu fasilita prosesu eleisaun iha Korea do Súl no Inglatera tuir planu governu.

ʺIha proposta ida maka tama ona ba Konselhu Ministru hodi deskuti maka posibilidade alargamentu ba implementasaun  eleisaun ekterior iha Koreia do Súl no Englatera,ʺ Ministru Hernani hateten asuntu ne’e iha Parlamentu Nasionál.

Governante ne’e hateten, MNEC iha dadus kompletu konaba lokalizasaun sidadaun Timor-oan iha Koreia do Súl.

ʺDadus trabaldores ami kompletu, sira hela iha ne’ebe tamba ne’e fasil bainhira atu halao eleisaun so problema maka englatera Timor oan barak maka iha neba no ba ho inisiativu rasik,ʺ tenik membru governu ne’e.

Hernani Coelho realsa, nia parte oras ne’e halao hela avaliasaun ba partisipasaun sidadaun Timor oan iha Australia no Portugal durante Eleisaun Prezidensiál 20 Marsu.

ʺResultadu eleisaun prezidensial hatudu partisipasaun sidadaun Timoroan iha Australia no Portugal kuaze porsentu 40 husi sidadaun rihun 1 resin tamba ne’e sei halo alterasaun no mudansa ba fatin votasaun iha Eleisaun Parlamentár,ʺ esklarese Ministru Hernani.

Sidadaun Timor oan ne’ebe oras ne’e servisu iha Korea do Súl kuaze rihun 2 no iha englatera besik rihun sanulu.

Jornalista: Agapito dos Santos / Editor: Gantry Meilana

HUSIK IDA HATÁN