Edukasaun Fatór Importante ba Dezenvolve Ekonomia

0
34
Estudante Eskola Báziku Sentrál, 30 Agostu, Komoro bainhira partisipa lansamentu laboratóriu siénsia. Foto Tatoli: Rafy Belo

DILI, (TATOLI) – Diretór KOICA (Korean International Cooperation Agency), Hyeong Cheol Kang hateten edukasaun mak setór importante liu atu ajuda Timor-Leste (TL) ninia ekonomia bele dezenvolve di’ak no sustentavel.

“Tanba ne’e KOICA iha Timor-Leste espesialmente foku ba setór edukasaun”, hateten Cheol Kang iha nia intervensaun lansamentu ofisiál ba laboratóriu siénsia iha Eskola Báziku Sentrál (EBS), 30 Agostu, Komoro, sesta (21/4).

KOICA halo ona projetu barak hanesan rehabilitasaun Eskola Téknika Becora (ETB), dezenvolve livru no profesór sira-nia livru matadalan ba eskola bázika no sekundária sira. Korea mós uluk iha ambiente edukasaun ne’ebé ki’ak lós depois krize ne’ebé Korea liliu iha 1950.

“Momentu ne’ebé Korea la iha turma eskola ne’ebé di’ak no livru maibé korea oan sira nunka lakon hakarak atu estuda nafatin”, haktuir Diretór KOICA.

Depois 1960 governu Korea mós halo esforsu barak atu koopera ho nasaun barak hanesan iha Timor-Leste, nasaun barak iha Áfrika nomós Amérika Sul liuhusi KOICA.

Uluk mós governu Korea haruka ona forsa armada sira mai atu suporta TL nia indepedéndsia mós governu fó nafatim ajudu barak liuhusi projetu sira, treinamentu no haruka voluntáriu sira mai liuhusi kooperasaun ho governu TL.

Ho lansamentu laboratóriu siénsia, nia espera estudante sira sei aproveita didi’ak, estuda ho buat sira ne’e no aban bainrua sei sai duni parte prinsípal atu dezenvolve Nasaun.

“Ha’’u fiar, Timor-Leste mós loron ida sei bele sai hanesan Korea atu fó suporta fali ba nasaun seluk”, espera.

Atu konklui, nia husu atu parte hothotu koopera hamutuk katak inan aman, profesór sira tenke tau forsa hamutuk atu fó kondisaun di’ak liutan atu estudante sira bele estuda no konsentra di’ak ho saida mak sira estuda ona iha eskola. “Estudante sira mós tenke estuda barak”, husu.

Jornalista: Rafy Belo

Editora: Rita Almeida

HUSIK IDA HATÁN