Deputadu Sira Husu RTTL.ep Hametin Imparsialidade

0
79
Logo RTTL.ep. Foto espesiál

DILI, (TATOLI) – Deputadu Virgilio Hornay no Francisco Miranda Branco husu ba jornalista Radiu Televisaun Timor-Leste. ep (emprensa públiku) atu hametin imparsialidade duke interese grupu no polítiku sira. 

“Funsionariu RTTL imi tenke hala’o kna’ar ho loloos no momos, polítika husik ba polítiku nain sira mak halo”, deputadu Virgilio Hornay hosi bankada Partidu Demokrata bolu atensaun liuhosi plenária Parlamentu Nasioná.

Nia hatutan: “Husu atu RTTL tenke imparsial, ha’u nota iha ona tendensia politizasaun, liu-liu prosesu rekrutamentu, promosaun no auditing sira”.

Bainhira RTTL la-mantein imparsialidade, loron ruma bele la-hetan fi’ar hosi públiku, tanba ohin loron mosu tan ona televisaun privadu sira.

RTTL tenke ka’er metin prinsípiu imparsialidade bainhira halo kobertura, nune’e kontribui ba dezenvolvimentu informasaun ne’ebé justu hodi informa no eduka sidadaun.

Ho nune’e nia aseita ho reestrutura sira ne’ebé mak ohin loron la’o iha RTTL nia laran, mai husu atu ka’er metin prinsípiu imparsial, labele fó fatin ba intervensaun polítika hodi hafraku sistema no prinsípiu jornalismu.

Entretantu, deputadu Francisco Branco husi bankada FRETILIN reforsa tan, funsionamentu mídia tenke buka atu defende interese públiku la’ós interese grupu.

Husu atu funsionariu RTTL tenke korajem atu hadok-án hosi intervensaun sira, nune’e bele servi públiku ho imparsiál.

Iha parte seluk Prezidenti Board RTTL, Milena Abrantes hatan, nia parte disponivel hodi hatan ba Parlamentu Nasionál kona-ba asuntu ne’e se bainhira deputadu sira presiza.

“Imprinsipiu ami nia prosesu tomak la’o tuir regras. Ami disponivel atu fó esplikasaun ba Parlamentu bainhira presiza”, haktuir.

Hodi reforsa, deskonfiansa intervensaun polítika iha RTTL ne’e laloos. RTTL mantein inparsialidade nu’udar prinsípiu baze bainhira hala’o kna’ar.

Jornalista: Manuel Pinto

Editora: Rita Almeida

HUSIK IDA HATÁN