Deputadu FRETILIN Kestiona Implementasaun Merenda Eskolár

0
43
Plenária Parlamentu Nasionál.

DILI, (TATOLI) – Deputadu Osorio Florindo ho Anastácia da Costa Amaral hosi bankada FRETILIN kestiona implementasaun programa merenda eskolár, tanba ne’e husu ba Ministériu Edukasaun atu halo esplikasaun.

“Problema merenda eskolár presiza iha investigasaun ida kle’an tanba diskunfia iha manipulasaun ne’ebé organizadu”, Osorio Florindo haktuir iha intervensaun plenária Parlamentu Nasionál (PN), segunda, (24/4).

Tuir nia, tinan ida nia laran estudante sira tenke han iha eskola durante loron 90. Maibé, realidade ne’ebé mak detekta iha munisípiu sira, eskola balun mak estudante sira han iha semana ida durante fulan ida.

Iróniku, estudante sira han de’it durante semana ida iha fulan ida tomak, hafoin la-han ona. Mas, osan ne’ebé mak aloka ezekuta pursentu 100. “Tuir loloos ne’e osan restu tenke fila ba kofre Estadu, ne’e presiza investigasaun”, deputadu ne’e hato’o ninia razaun atu halo investigasaun.

Hanoin hanesan hato’o hosi deputada Anastacia da Costa Amaral. “Osan ne’e gasta la-hotu, sera que nia restu hira mak fó fila ba kofre do Estadu, presiza esplikasaun”, dehan.

Tuir relatóriu monitorizasaun Provedor Direitus Humanus e Justisa (PDHJ) iha fulan-setembru 2016, implementasaun programa ne’e hamosu alvu violasaun hasoru prinsípiu ba boa-governasaun nomós Direitus Umanus iha administrasaun.

Entretantu polítika implementasaun programa ne’e hodi reduz ekonomia familiár inklui nutrisaun la-di’ak, nune’e inan aman sira lalika lakon osan ba oan sira atu han iha eskola.

Merenda eskolár ninia benefisiu ba estudante sira atu estudante sira badinas tuir prosesu aprendizajen.

Jornalista: Manuel Pinto

Editora: Rita Almeida

HUSIK IDA HATÁN