Deputadu Bianco Husu Governante Sira Domina Lei

0
123
Plenária debate konta jerál Estadu 2014-2017. Foto Tatoli/Antonio Goncalves

DILI, (TATOLI) – Deputadu Antoninho Bianco hosi bankada FRETILIN husu ba governante sira atu domina lei no regra servisu, liliu norma ezekusaun orsamentu.

“Servidór Estadu tenke buka domina lei ne’ebé mak aplika iha Timor-Leste, ohin loron servidór Estadu barak mak la-domina lei no regras iha instituisaun ne’ebé sira servisu”, Bianco hato’o apresiasaun debate konta jerál Estadu 2014 to’o 2015 iha uma fukun, segunda (18/4).

Frakeza governu hosi rezultadu fiskalizasaun juridisionál Kámara Kontas Tribunál Rekursu ba ezekusaun orsamentu jerál 2014 to’o 2015 hatudu momos katak governu fraku kumpriende téknika no regra ezekusaun orsamentu.

Tuir nia situasaun ne’e nu’udar lisaun aprendizajen, hahú polítiku nain, servidór Estadu no Nasaun nia tomak esforsu domina lei iha fatin ne’ebé mak sira haknaar-án, nune’e de’it mak futuru mai ukun nain bele serve di’ak.

Biar nune’e, nu’udar opozisaun, bankada FRETILIN mós rekuñese katak durante ne’e iha buat balun mak governu konsege alkansa ona iha objetu tuir planu asaun annuál governu nian, maibe labele nega mós buat barak mak seidauk atinji.

Atu atinji tomak, FRETILIN sujere governasaun ida ne’ebé mak sei mai tenke hakribi atetude egosektorál, maibé buka promove servisu hamutuk hodi ajuda malu alkansa objetivu ne’ebé deside ona hosi polítika governu nian.

Kestaun inportante seluk mak alkansa objetivu, funsionariu públiku sira hosi loron ba loron buka hakas-án atu hakle’an nia koñesimentu ba área ne’ebé sira hakna’ar-án ba.

Entertantu rezultadu fiskalizasaun Tribunál Rekursu ba ezekusaun Orsamentu Jerál Estadu tinan 2014 to’o 2015  rekuñese prestasaun konta fundu konsolidade Timor-Leste, fundu infraestruktura no fundu dezenvolvimentu kapitál úmanu ba tinan finanseira 2014, validu ona, halo tuir prinsípiu konstitusionais.

Jornalista: Manuel Pinto

Editora: Rita Almeida

HUSIK IDA HATÁN