Atleta Na´in Tolu Hetan Medalla 8 iha Filipina

0
78
Atleta na´in 8 hamutuk ho treinadór na´in 2 fila hikas ona mai TL, hafoin partisipa eventu rua iha Filipina. Imajen Ajénsia TATOLI/Xisto Freitas

DILI (TATOLI)—Atleta na´in tolu hosi na´in ualu hosi Federasaun Atletizmu Timor-Leste ne´ebé partisipa eventu rua hanesan 12 th South East Asia Youth Athletics Championship 2017 no Phillipine National Open Invitational Athletics Championships 2017 iha Filipina, hetan medalla 8.

Atleta na´in tolu ne´ebé hetan prestasaun di´ak iha eventua rua ne´ebé hala´o iha 26 Marsu-4 Abril 2017 ne´e maka hanesan Rubia Fátima Martins (17), Felisberto de Deus (17) no Ermelinda de Jesus Hornai (16).

Atleta na´in tolu ne´ebé hetan prestasaun di´ak iha eventu rua iha Filipina, maka hanesan Rubia (túr iha liman karuk), Ermelinda (klaran) no liman loos (Felisberto). Imajen Ajénsia TATOLI/Xisto Freitas
Atleta na´in tolu ne´ebé hetan prestasaun di´ak iha eventu rua iha Filipina, maka hanesan Rubia (túr iha liman karuk), Ermelinda (klaran) no Felisberto (liman loos). Imajen Ajénsia TATOLI/Xisto Freitas

Atleta  Rubia Fátima Martins hetan primeira klasifikasaun ho kategoria 3000m Sc ho tempu (11.35) nomós primeira klasifikasaun iha kategoria 5000m ho tempu (19:10) iha 12 th South East Asia Youth Athletics Championship 2017. Ba prestasaun ida ne´e, Rubia simu medalla osan mean rua hosi kategoria rua ne´e.

Iha Phillipine National Open Invitational Athletics Championships 2017, Rúbia Fátima Martins hetan segundu klasifikasaun ho kategoria 3000m ho tempu (10:26) no terseiru klasifikasaun ho kategoria 2000m ho tempu (7:14). Ba prestasaun ida ne´e, Rubia simu medalla prata ida ba kategoria 3000m no bronzo ida ba kategoria 2000m.

Atleta Felisberto de Deus só hetan de´it klasifikasaun iha eventu Phillipine National Open Invitational Athletics Championships 2017 nu´udar primeiru klasifikasaun ho kategoria 3000m Sc ho tempu (09:45) no segundu klafisikasaun ho kategoria 5000m ho tempu (16:10). Ba prestasaun ida ne´e, Felisberto simu medalla osan mean ida hosi kategoria 3000m no simu medalla prata hosi kategoria 5000m.

Enkuantu, atleta atleta Ermelinda de Jesus Ornai mós hetan de´it klasifikasaun iha eventu Phillipine National Open Invitational Athletics Championships 2017, nu´udar segundu lugár ho kategoria 3000m no terseiru lugár iha 5000. Ba prestasaun ida ne´e, Ermelinda simu medalla prata ida ho kategoria 3000m no simu medalla bronze ida ho kategoria 5000m.

Atleta hirak ne´e, to´o hikas fali iha Timor iha Kinta ne´e, ne´ebé simu direta hosi Sekretáriu Estadu Juventude no Desportu, Leovigildo Hornai ho nia estrututa, Prezidenti Konfederasaun Desportivas Timor-Leste (CDTL), Afrânio Xavier ho nia estrutura nomós atleta senior sira iha Aeruportu Internasionál Prezidenti Nicolau Lobato, Comoro, Dili.

Jornalista: Xisto Freitas / Editor: Gantry Meilana

HUSIK IDA HATÁN