Assalam no Ultramar Duni Malu iha Grupu B

0
39
Kompetisaun entre ekipa Assalam FC (costum verde) no Lica-Lica FC (costum azúl) iha Estádiu Munisipál Dili, Tersa horsehik. Imajen Mídia LFA

DILI, (TATOLI) – Iha grupu B Segunda Divizaun Liga Futeból Amadora (LFA) époka 2017, Assalam FC no Atletico Ultramar maka duni malu. Oras ne’e, Assalam sa’e ba pontus 9 no Ultramar provizoriamente lidera grupu ho pontus 10.

Klube rua ne’e sei iha oportunidade atu aumenta tan sira nia pontu iha jogu tuir mai. Assalam sei iha tan jogu rua no Atletico Ultramar mós sei iha tan jogu rua hodi termina primeira faze époka daruak ne’e.

Assalam konsege atinji pontus 9 nu’udar segunda klasifikasaun Grupu B hafoin iha jogu ba dala haat ne’ebé hala´o iha Estádiu Munisipál Dili, tersa horsehik, manán Lica-Lica FC ho golu 2-0.

Golu hosi Assalam atinji iha minutu 63, hosi jogadór suplenti hosi nasaun Chile, Cristian Pena. Golu seluk akontese iha minutu 77, ne’ebé maka oferese hosi jogadór hosi Indonézia, Dedi Pramono.

Enkuantu, Lica-Lica FC to’o ohin loron seidauk kolleta valór maske hala’o jogu ba dala rua ona. Oras ne’e, Lica Lica FC okupa nafatin pozisaun 7 ou pozisaun dezpromosaun (degradasi).

Jornalista: Xisto Freitas

Editora: Rita Almeida

HUSIK IDA HATÁN