Abio Salsinha Hekerek Livru “Kamera Cinta”

0
129
Abio Salsinha

DILI, (TATOLI) – Artista nasionál famozu, Abilio Soares Salsinha ne’ebé kuñesidu ho naran estimadu Abio Salsinh, la’ós foku ba múzika de’it maibé hala’o mós atividade seluk mak hakerek livru ho títulu “Kamera Cinta” ne’ebé sei lansa iha inísiu juñu tinan ne’e iha Jakarta, Indonézia.

Nia hakerek livru refere tanba haree ba aspeitu pozitivu maka kamera ne’e ema utiliza hasai foto hodi rai hanesan rekordasaun ida. Negativu maka agora dadauk ne’e teknolojia avansadu teb-tebes, tan ne’e bainhira ema uza sala foto, bele estraga reputasaun.

 Bainhira Abio Salsinha halimar filme iha Indonézia hamutuk ho artista Indonézia.
Bainhira Abio Salsinha halimar filme iha Indonézia hamutuk ho artista Indonézia.

“Tanba ne’e maka livru ida ne’e fó hanoin ba ita foinsa’e, ferik no katuas sira katak uza kamera ne’e tenke uza tuir nia dalan tanba ita gosta hasai foto maibé ita la-hatene katak ninia implikasaun ne’e boot la-halimar ba ita nia moris”, dehan ba jornalista sira iha Hotel Vila-Verde, Dili, sábadu (22/4).

Abio esplika, antes ne’e, nia hakerek livru ne’e iha lian Tetun maibé tanba leitór timoroan ne’e oituan de’it, entaun nia hakerek iha língua Indonézia.

“La’ós ita la gosta ita nia lian, maibé tanba haree ba aspeitu negósiu, merkadu iha Indonézia boot liu kompara ho merkadu Timor”, tenik.

Abio haktuir, livru ne’e ho pájina atus rua no sei patrosina hosi Gramedia sira iha Indonésia. Etapa dahuluk sei produs ho kuantidade  50,000. Livru ne’e edita hosi profesór ida iha Indonézia ho naran Lutfi.

Abio involve iha atividade syuting nu´udar atór ba filme ida iha Indonézia.

“Bainhira ita hakerek livru ne’e tenke foku no bazeia ba realidade. Labele inventa”, kompozitór múzika “Maria la Jadi” informa.

Nia hatutan, hanesan foinsa’e ida, labele túr hateke de’it maibé tenke halo buat ne’ebé ita bele halo. Nia mai ho slogan ida katak “durante ita sei moris, di’ak liu ita halo hela buat ruma no bainhira husik hela mundu ne’e, rai hela istória ne’ebé di’ak”.

Iha biban lansamentu ba livru ne’e, Abio haklaken, nia mós sei lansa ninia album múzika ba dala ualu iha DVD. Album ne’e iha múzika 10 kona-ba Timor-Leste, múzika sosiál no domin. Nia halo kolaborasaun ho artista Indonézia.

“Ha’u hakarak kria de’it relasaun katak tanba ita Timor besik liu-ba nasaun Indonézia, buka esperiénsia hodi hatutan ba ita nia foinsa’e sira iha Timor no promove múzika Tetun iha Indonézia”, dehan Abio ne’ebé moris iha Suku Açomano, Liquiça, 4 Fevereiru 1980 ne’e.

Múzika Tetun ne’ebé nia kanta iha Indonezia, dalabarak ema admira tanba kanta múzika lian nasionál iha ema rain ne’e la fásil. Maibé, tuir nia, importante maka kria amizade ne’ebé di’ak.  Nia kanta ona múzika Tetun iha estasaun televizaun iha Indonézia hanesan Facebooker, Trans TV, Trans7, Chanel TV no Matriks TV.

Loloos ne’e, oan hosi Ângelo Soares no Angelina Salsinha hateten, lansamentu ba livru no album ne’e hala’o iha 30 abril maibé tanba atór prinsipal sira hanesaan Jesica Iskandar, Ayu Ting-Ting no Raffi Ahmad sei ba féria iha Hongkong, entaun lansamentu muda fali ba iha juñu.

Jornalista: Xisto Freitas

Editora: Rita Almeida

HUSIK IDA HATÁN