UNTL Hatudu Karáter Nasionál

0
60

DILI, (ANTIL) – Tuir Planu Estratejiku Universidade Nasionál Timor Lorosa’e (UNTL) ba 2011 to’o 2020 mak dezenvolve kooperasaun bilaterál nomós multilaterál hodi hatudu, implementa karáter internasionál no nasionál tuir akordánsia Planu Stratejia Universidade nian.

“Kooperasaun hanesan vitória prinsipál ba dezenvolvimentu UNTL, nu’udar universidade públiku demonstra no implementa karáter internasionál no nasionál tuir akordánsia Planu Stratejia Universidade nian”, reitór UNTL, Francisco Miguel Martins iha serimónia lansamentu kursu lian Japaun iha salaun auditorium, Fakuldade Edukasaun Arte no Umanidade (FEAU), foin lalais ne’e.

Universidade ne’e halo ona kooperasaun kuaze atus rua resin ho nasaun oioin inklui Japaun, liliu hamutuk instituisaun superiór sira, enkuadradu iha objetivu estratéjiku dezenvolvimentu universidade.

“Abordajen ne’e orienta ba kooperasaun atu permite dezenvolvimentu ba inisiativa ezistente, hahú no estabelese kooperasaun inovativu, dinámiku no partisipasaun ativu ne’ebé signifakante ba edukasaun internasionál, treinamentu no programa peskiza”, akresenta.

Embaixadór Japaun ba Timor-Leste, Eiji Yamamoto informa, Japaun mós estabelese ona kooperasaun ho UNTL liliu ho Fakuldade Enjeñaria, Siénsia no Teknolojia (FEST) no agora haluan tan kooperasaun ho Fakuldade Ekonomia no Jestaun (FEJ), Departementu Turizmu, Jestaun no Ekonomia (DTJE) hodi fornese kursu lian Japaun nian.

“Espera kursu ne’e bele sai hanesan sentru ida ba estudante sira ne’ebé hakarak atu aprende lian Japaun nian, kuñesimentu no abilidade iha lian Japaun sai hanesan trunfu ka aset boot ba estudante sira, liliu sira ne’ebé hakarak tebes atu serbisu iha área turizmu no indústria”, espera.

Kursu ne’e hala’o iha FEJ, dezde Jullu to’o Outubru 2016 ho partisipante estudante na’in 20 husi DTJE.  Tinan ne’e, lansa diretamente husi reitór no Embaixadór, asiste husi eis-reitór UNTL, Benjamin Corte Real de Araújo, reprezentante Ministériu Edukasaun, Diretora Elsa Coreia, estrutura UNTL balun inklui estudante sira.

Hafoin tuir kursu ne’e, estudante sira tuir selesaun hodi partisipa iha programa Japan-East Asia Network of Exchange for Students and Youths (JENESYS), 2016 nu’udar projetu ne’ebé avansa husi governu japaun liuhusi ponto de vista ne’ebé fornese baze solidu ida ne’ebé forte ba solidaridade ida entre joven sira liuhusi interkámbiu ho eskala boot.

http://sv2.jice.org/jenesys/e/about-jenesys/about-program/

Jornalista: Rafy Belo

Editora: Rita Almeida

HUSIK IDA HATÁN