Prezidenti Taur Hato’o Sentidu Kondolénsia Ba Falesimentu Senadora Japaun

0
56

DILI TATOLI—Prezidente Repúblika, Taur Matan Ruak, Kinta-Feira semana ne’e hato’o sentidu kondolénsia ba falesimentu Senadora Japaun, Tomiko Okazaki ne’ebé is kotu iha loron 19 Marsu 2017 ho idade 73.

“Sente trsite rona notisia kona-ba Sra. Tomiko Okazaki nia mate. Sra. Okazaki ema ida ne’ebé dedika mós nia tempu lubuk ida hodi apoiu luta Timor-Leste nian iha nia rain Japaun no mós iha Nova Yorke iha tempu okupasaun nian. Ninia mate hanesan lakon boot ba Timor-Leste,” Taur hato’o sentidu kondolénsia ne´e liuhusi komunikadu imprensa ne’ebé Ajénsia Tatoli simu hosi Mídia Palásiu Prezidénsia Repúblika, Kinta ne´e.

Nune’e aproveita biban ne’e, Prezidenti Repúblika  lori povu Timor-Leste nia naran hato’o sentimentu solidaridade no kondolénsia ba família Okazaki nian. Sra. Okazaki nia dedikasaun no apoiu ba Luta Ukun Rasik An timoroan nian sei metin iha povu Timor-Leste nia fuan to’o rohan laek”.

Senadora, Tomiko Okazaki, hosi Sidade Fukushima, moris iha loron 16 Fevereriu 1944. Nia hanesan ema polítiku Japaun  nian ba Partidu Demokrata Japaun, Membru  Kâmara ba  Konselleirus iha Dieta (Lejizlatura Nasionál) no hanesan House of Councillors iha tinan 1997.

Iha tinan 1980, nia luta ba rekuñesimentu restaurasaun RDTL nian ne’ebé la’os de’it iha Japaun maibé mós  iha Nova Yorke, Estadus  Unidus. Nia  dedika nia tempu lubuk ida ba luta Timor-Leste nian inklui halo moris fila-fali Tetum liuhosi Darwin Tetum school iha tempu ne’eba.

Ho nia dedikasaun sira ne’e, nia hetan apresiasaun hosi timoroan barak inkluidu Kay-Rala Xanana Gusmão no  atual Xefe Estadu, Taur Matan Ruak.  Ba nia dedikasaun refere, Senadora Timiko Okazaki hetan rekoñesimentu hosi Estadu Timor-Leste ho kondekorasaun Órden Timor-Leste iha 9 Setembru 2015, iha Tokyo. (Jornalista: Xisto Freitas)

 

HUSIK IDA HATÁN