Prezidenti Cacusan CF Konsidera Zebra Mellór Ekipa

0
99
Ekipa Cacusan CF

DILI, (TATOLI) – Prezidenti Cacusan CF, João Maneco Soares konsidera, Zebra FC nu’udar klubu di’ak tanba reforsa hosi jogadór estranjeiru na’in tolu hosi Gana na’in 1 no brazileiru na’in rua.

“Ba ha’u, ekipa Zebra nia joga hahú di’ak tanba sira iha jogadór estranjeiru na’in tolu no aumenta tan jogadór lokál ne’ebé maka di’ak”, Maneco ba Ajénsia TATOLI via telefónema hosi Baucau, Sesta ne’e.

Nia hatutan, preparasaun Cacusan atu joga hasoru Zebra FC iha Estádiu Munsipál Baucau, Domingu (26/3), hanesan baibain no sempre optimista manán, maibé Zebra benefísiu liu tanba joga iha Zebra ninia knuuk.

Tanba ne’e, nia dehan, Cacusan buka atu halo balansu jogu. Hanesan eis jogadór Zebra FC ne’ebé oras ne’e lidera Cacusan CF, Maneco hatán, nia sei uza sentimentu profisionalizmu bainhira joga hasoru Zebra.

“Ha’u nu’udar eis jogadór Zebra ne’ebé gasta tempu joven iha Zebra, tanba profisionalizmu, ohin ha’u hola pozisaun lidera klubu seluk. Tanba ne’e, bainhira Cacusan joga hasoru Zebra, ha’u hamriik iha liña profisionál”, informa.

Prezidenti klubu ne’e esklarese, adeptus Cacusan sei marka prezensa másimu iha jogu bainrua tanba adeptu sira fiel ba Cacusan.

Jornalista: Xisto Freitas

Editora: Rita Almeida

HUSIK IDA HATÁN