PR Taur Kondekora Instituisaun PNTL

0
28
PR, Taur Matan Ruak kondekora PNTL, iha Aniversariu PNTL ba dal-17, iha Akademia Polisia PNTL, Komoro, Segunda (27/03) Foto: ANTIL Antonio Goncalves

DILI (TATOLI) – Prezidente Repúblika Taur Matan Ruak Kondekora instituisaun Polisia Nasional Timor-Leste (PNTL) ho medallia Colár de Timor-Leste iha loron aniversairu PNTL ba dala 17 ne’ebe selebra iha Academia Polisia, Comoro, Dili, Segunda (27/03/2017).

Kondekorasaun ne’e baseia ba dekretu Prezidente Republika numeru 11/2017, 24 Marsu.

Alende fó ba instituisaun, Prezidente Repúblika mós fo kondekorasaun medallia Insigniu Ordem de Timor-Leste ba Komandante PNTL, Komisariu Julio Ornai tuir dekretu Prezidente númeru 10/2017, 24 Marsu.

ʺKondekorasaun ne’e atu rekonese servisu instituisaun PNTL no ba servisu hirak nebe’e nia (Julio Ornai) presta iha instituisaun ida ne’e, tamba ne’e ha’u kondekora nia,ʺ dehan PR Taur Matan Ruak iha nia diskursu.

Xefe Estadu iha okaziaun ne’e husu mós ba Governu atu kontinua dezemvolve instituisaun PNTL liliu formasaun rekursu umanus, fasilidades, moris diak no seluk tan.

Ho dedikasaun no servisu PNTL durante ne’e, liliu asegura seguransa ba povu iha eleisaun  xefe suku to’o Prezidensial lao ho susesu, lori xefi estadu ne’e mos kongratula ba prestasaun ne’e.

Komando PNTL mós distribui medallia hodi kondekora  no promosaun  ba membru PNTL nebe’e presta servisu ho di’ak kuase ema lima nulu, Polisia Internasional husi Australia, Nova Zelandia, Portugal inklui Vise Ministru Administrasaun Estatal, Tomas do Rosario Cabral.

Eis Prezidente Repúblika, Jose Ramos Horta apresia ba desemvolvimentu no profesionalismu instituisaun PNTL durante tinan 5 ikus 2012-2017.

ʺProgresu dia’k, profesionalismu diak liutan, ekipamentus no infrastutura  lao diak nomos numeru kriminalidade tun iha Timor Tamba Polisia ninia intervensaun,ʺ komentariu Ramos Horta.

Maski nune’e, eis PR ne’e husu ba insituisaun atu  hadia diak liutan profesionalismu atu mana konfiansa husi povu no mundu internasionál.

Jornalista: Agapito dos Santos / Editor: Gantry Meilana

 

HUSIK IDA HATÁN