PR Taur Hato’o Parabèns ba Lú-Olo

0
482

DILI, (TATOLI) – Prezidente Repúblika, Taur Matan Ruak hato’o votu parabèns ba prezidente eleitu Francisco Guterres Lù-Olo ne’ebè hetan vitòria iha eleisaun prezidensiàl 20 Marsu 2017.

“Parabèns ba Prezidente eleitu doutór Francisco Guterres Lù-Olo”, Taur Matan Ruak ba jornalista sira iha salaun Delta Nova Dili, Kuarta, (22/3).

PR Taur mós apresia ba maturidade polìtika hosi kandidatura na’in ualu ne’ebè kompete iha eleisaun  tanba kumpri regras hosi Komisaun Nasionál ba Eleisaun nomos hametin pàs no estabilidade. “Ba kandidatu sira ne’ebè konkore, parabèns ba sira tanba lidera kampaña ho ita nia povu la’o ho di’ak”, Xefe Estadu tenik.

Situasaun seguransa rai laran la’o hakmatek tanba hetan seguransa husi hosi Polìsia Nasionàl Timor-Leste (PNTL) no FALINTIL-FDTL.

Tuir ninia observasaun, durante eleisaun povu barak la-partisipa màsimu iha eleisaun. “Parabèns ba ita nia povu tanba sivismu, partisipasaun maske la-màsimuʺ, esklarese Taur.

Jornalista: Agapito dos Santos

Editora: Rita Almeida

HUSIK IDA HATÁN