PM Simu Xefe Delegasaun Deputadu Parlamentu Europeu

0
64
Delegasaun deputada parlamentu Uniaun Eropeia hasoru Primeiru Ministu, Kuarta, (22/3) iha Palásiu Governu. Foto GPM

DILI (TATOLI) – Primeiru Ministru (PM), Rui Maria de Araújo simu Xefe Delegasaun deputadu Parlamentu Europeu hosi Misaun Observasaun Eleitorál, Kuarta (22/3).

“Governu nia foku maka garante katak instituisaun Estadu nian serbisu ho forma kredível no profisionalizmu, liu-liu iha kestaun manutensaun ordem públika nian”, tenik PM.

Hodi Governu nia naran, PM apresia bainhira Uniaun Europeia husu kona-ba observasaun eleitorál. Xefe Governu mós kontente ho forma madura ne’ebé instituisaun Estadu, líder sira no povu hatudu ona durante prosesu eleitorál tomak.

Nune’e mós, deputada Ana Gomes kongratula PM ba susesu prosesu eleitoràl nian, elojia ho lala’ok eleisaun nian tanba prosesu la’o ho hakmatek. Urna sira hosi parte populasaun maka hatudu maturidade boot, liu-liu konsidera, Timor-Leste rasik organiza ba eleisaun sira.

Durante enkontru ne’e, ko’alia mós tema sira seluk ne’ebé relasiona ho eleisaun parlamentar oin mai nomós investimentu reseita hosi fundu petrolíferu iha prosesu dezenvolvimentu.

Xefe Delegasaun deputadu sira hosi Parlamentu Europeu, Ana Gomes, reitera totál disponibilidade hosi Parlamentu Europeu atu apóia Nasaun ne’e iha aspetu hotu-hotu, liu-liu atu haburas demokrasia.

Okaziaun ne’e, deputada Ana Gomes akompaña husi deputada Marisa Matias no Inese Vaidere,  nomós Embaixadór Uniaun Europeia iha Timor-Leste, Alexandre Leitão.

Jornalista: Julia Chatarina

Editora: Rita Almeida

HUSIK IDA HATÁN