Papél Governu Mak Promove Setór Privadu

0
76
Koordenadór AIFAESA, I.P, Abilio Oliveira Sereno no Diretór sira husi AIFAESA hala'o sorumutuk ho Diretór Ezekutivu SERVE Florêncio Sanches iha Matadouru hodi koordena malu sobre servisu instituisaun rua ne'e.

DILI, (TATOLI) – Diretór Ezekutivu Servisu ba Rejistu no Verifikasaun Emprezariál (SERVE), Florêncio Sanches, hatete, governu nia papél mak promove setór privadu sira. 

“Papél Governu nian klaru katak tenke promove ita-nia setór privadu sira, tanba ne’e mak instituisaun foun ne’e, tau matan direta ba inspesaun, tenke hatudu ba setór privadu sira ne’ebé halo negósiu mai ho kualidade”, Florêncio ba Ajénsia TATOLI iha Matadouru, ohin.

Ho papél ne’e, Koordenadór Autoridade Inspesaun no Fiskalizasaun ba Atividade Ekonómika, Sanitária no Alimentár, Institutu Públiku (AIFAESA, I.P), Abilio Oliveira Sereno ho Diretór Ezekutivu Servisu ba Rejistu no Verifikasaun Emprezariál (SERVE), Florêncio Sanches, hala’o sorumutuk dahuluk hodi ko’alia kona-ba papél AIFAESA no SERVE, oinsá bele koordena malu iha ámbitu servisu nian.

Florêncio Sanches hatete, maski AIFAESA foin hamriik maibé hatudu nia profisionalizmu ne’ebé aas tebes no konsege koordena ho instituisaun seluk ne’ebé relevante.

Diretór Ezekutivu ne’e hatutan tansá mak parte SERVE nian tenke servisu hamutuk ho AIFAESA, tanba SEREVE mak hasai legalidade ba empreza sira. Bainhira SERVE lahatudu dokumentu entidade legál ba AIFAESA entaun labele halo buat ida.

Instituisaun  rua ne’e iha papél importante tebes no iha intensaun ida mak promove setór privadu sira.

“Agora setór privadu sira mak tenke hatene tanba iha lei lubuk ida mak sira tenke kumpri antes halo negósiu komersiál no investimentu”, katak tan.

Lei rua la’o ketak-ketak maibé nia tutun ida de’it mak dezenvolve ekonómiku, tanba ne’e mak AIFAESA nia polítika ne’ebé hakerek klaru iha dekretu lei katak tau matan diretamente kualidade saida mak iha husi parte saúde, alimentár nian no SERVE haree ba legalidade iha Firma sira, katak.

SERVE halo ona uluk koordenasaun ho Autoridade Nasionál Petróleo no Minerál (ANMP) ne’ebé halo servisu di’ak tebes, Banku Setrál Timor-Leste (BSTL), Ministériu Agrikultura no Peska (MAP) no Ministériu Turizmu, Arte no Kultura (MTAK) tanba Estadu ida ne’e tenke serví ba povu.

Iha enkotru ne’e, koordenadór AIFAESA husu dadus firma sira ne’ebé rejistu iha Timor-Leste no SERVE dadaudun ne’e sei utiliza sistema tributáriu ne’ebé lafó asesu diretamente, nune’e pedidu husi AIFAESA tenke han fulan ida maibé SERVE iha ona planu atu sosa sistema rasik.

Aleinde ne’e ko’alia mós Dekreto – Lei n° 26/2016 de 29 de Juñu ne’ebe kria ona Autoridade ba Inspesaun no Fiskalizasaun ba Atividade Ekonómika, Sanitária e Alimentar, I.P.

Jornalista: Maria Auxiliadora

Editora: Rita Almeida

HUSIK IDA HATÁN