Fulan Rua Bolseiru Timoroan iha Brazil Sedauk Simu Osan

0
537
Foto: Google.com

DÍLI, (TATOLI) — Bolseiru Timoroan sira iha Brazil, senti triste ba sira nia situasaun tamba fulan rua ona sira nia osan sedauk transfere hosi Timor-Leste hodi fo impaktu ba sira nia vida moris.

Koordenadór Gabinete Apoiu Estudante, Aquilis Salvador.

“Ami iha ne’e sedauk simu osan desde fulan rua, to’o ami nia kolega balun ne’ebe aluga iha ema nia uma, uma nain duni no triste wainhira rona uma nain dehan, se nasaun (Timor-Leste) kiak, lalika haruka mai,” dehan bolsileiru Brazil ida ne’ebe lakohi temi naran ba TATOLI foin lalais ne’e.

Koordenadór Gabinete Apoiu Estudante, Aquilis Salvador hateten pagamentu bolseiru sira iha estranjeiru, Ministériu Edukasaun (ME), la direta kedas ho Ministériu Finansa (MF) tanba iha Fundo Desenvolvimento Capital Humano (FDCH).

“Ita-nia osan ne´e ta´u hotu iha ne´ebá,” responde Koordenadór Aquilis Salvador ba TATOLI, iha salaun Ministériu Solidaridade Sosiál (MSS), Caicoli, Díli, Segunda (27/03/2017) bainhira husu kona-ba transferénsia osan tarde ba bolseiru sira ne´ebé estuda iha estranjeiru.

Nia reforsa, kualker atendementu, apoiu ruma ba estudante sira, MF prosesa tiha mak foin lori ba FDCH. “Fundu mak sei avalia buat hotu, mak sei ko´alia fali ho finansa ho Banku Sentrál para halo pagamentu,” esplika koordenadór ne´e.

Tanba ne´e, nia hateten, ita nesesita duni tempu ida para halo transferénsia bolsa estudu nian.

Koordenadór Gabinete Apoiu Estudante, Aquilis Salvador informa, oras ne´e Ministériu Edukasaun submete hotu ona dokumentu ba FDCH kuaze fulan rua ona Ba FDCH. “ Sira mak tenke halo oinsa pagamentu lalais ba ita-nia bolseiru sira,” nia salienta.

Jornalista: Rafy Belo / Editor: Gantry Meilana

HUSIK IDA HATÁN