MX Cesar Fahe Esperiénsia Halo Tarte ho Fehuk Midar

0
55
Reseita ka ingrediente Tarte Fehuk Midar ne’ebé aprezenta husi Mestre Xefe (MX) timoroan husi Aracs Café, Bar no Restaurante, Cesar Lordes ba formandu sira husi munisípiu 13, iha Restaurante Malmequer, Metiaut, Sesta, (24/3). Foto Tatoli/Rafy Belo

DILI, (ANTIL) – Mestre Xefe (MX) timoroan husi Aracs Café, Bar no Restaurante, Cesar Lordes fahe esperiénsia ba jerente restaurante timoroan sira husi munisípiu 13 kona-ba oinsá halo Tarte Fehuk Midar ho produtu lokál, iha Restaurante Malmequer, Metiaut, Díli, Sesta, (24/3).

Iha Ingrediente no ekipamentu oioin, no métodu ne´ebé aprezenta husi Mestre Xefe, Cesar Lordes oinsá atu halo Tarte Fehuk Midar ba formandu sira, banati ka halo tuir.

Ingrediente ne´e mak hanesan aifarina koi (250 gr), nuu koi (150 gr), kiar (100 gr), masin midar (kanuru 1-2) no mina nuu (kanuru xá 2).

Ekipamentu ne’ebé presiza mak oven ida, fórmula belar ba tarte ida, bikan kle’an ida, luvas liman, pinsel, rolling ping/ai silindru, dasi/balansa, colling crack (modelu).

Nune’e mós, métodu atu halo mak hanesan kahur ingrendientes hotu tomak, halo masa, rolu liu de’it, iha forma kose ho mina no manteiga, hanehan halo hanesan no tau ba fornu, 40-50 ou to’o tasak didi’ak (matan-indo) no mean no husik halo malirin.

Entretantu husi produtu sira ne’ebé aprezenta ne´e, Cesar Lordes sujere ba formandu sira katak presiza tau atensaun ba kompozisaun ingrediente ne´ebé mak iha.

“Produtu órganiku presiza halo kalkulasaun ne’ebé di’ak”, katak. Realidade timor nian, seidauk iha padraun ka produtu lokál, teste ona liuhusi laboratóriu hodi hatene loloos kompozisaun ingrediente.

Ho razaun ne’e, Cesar Lordes husu ba formandu sira atu halo kalkulasaun didi’ak, se lae haloTarte Fehuk Midar eh seluk tan la konsege sai.

Maske nune’e, nia sujere ba formandu sira hodi iha korajen atu koko bebeik bainhira halo la sai.

Formandu ida, Antoninho Maria Neto Mok, na’in ba restaurante Vitória Café, munisípiu Baucau ba Ajénsia Tatoli hateten, ho esperiénsia ne’ebé sira hetan sei implementa fila fali iha restaurant ne’e sira hakna’ar-án ba. “Ne’e para ami bele banati tuir”,  katak.

Formasaun kona-ba: “Gastronomia Sabores de Timor-Leste” ne’ebé organiza Ministériu Turismu, Arte no Kultura (MTAK) liuhusi Diresaun Nasionál Atividade Produtu Turistiku (DNAPT).

Formasaun ne’e, tuir observasaun husi Ajénsia Tatoli, hetan entuziasmu husi partisipante ka formandu sira ne’ebé mak mai partisipa no hala’o Kinta, (23/3) no Sesta, (24/3).

Jornalista: Rafy Belo

Editora: Rita Almeida

HUSIK IDA HATÁN