MTAK Hala’o Formasaun Atu Atrai Turizta

0
53
Formasaun kona-ba : “Gastrómia Sabores de Timor-Leste” ne’ebé organiza husi MTAK, iha Restaurante Malmequer, Metiaut, Díli, Sesta (24/03). Foto Ajénsia Tatoli: Rafy Belo

DILI, (TATOLI) – Ministériu Turismu, Arte no Kultura (MTAK) liuhusi Diresaun Nasionál Atividade Produtu Turistiku (DNAPT) hala’o formasaun anuál kona-ba aihan lokál (gastronomia) ba jerente restaurante sira iha munisípiu 13 hodi promove no hasa’e kualidade iha nívél nasionál hodi atrai turizta sira.

Partisipante formasaun, Antoninho Maria Neto Mok, na’in ba restaurante Vitória Café, Munisípiu Baucau.Foto Ajénsia Tatoli: Rafy Belo

Diretora Maria Ernestina Lopes, husi DNATP ba Ajénsia Tatoli, iha Restaurante Malmequer, Metiaut, Díli, Sesta (24/3), MTAK konvida jerente sira mai atu loke sira-nia hanoin kona-ba saida mak sira sei halo ba sira-nia restaurante.

“Atu loke sira-nia hanoin, ba futuru oin mai, saida mak sira se halo ba sira-nia restaurante, iha sira-nia serbisu fatin, atu hadi’a sira-nia kualidade. Entermus de hadi’a, ijiene, oinsá hasoru kliente ho di’ak”, Diretora Maria Ernestina dehan.

Se mak hakarak loke restaurante tenke tuir kritéria ne’ebé mak MTAK fó sai maske iha difikuldade maibé tenke iha kondisaun.

“Se ema ida mak hakarak loke restaurante tenke kria hariis fatin, feto no mane ketak, dapur tenke moos, tenke iha ekipamentu dapur nian nomós oinsá nia atendementu ba kliente sira ho di’ak”, katak.

Kona-ba uza aihan típika (gastronomia), Diretora Maria Ernestina Lopes hateten, atu promove nia kualidade ba iha nível nasionál atu promove ita-nia turizmu.

“Tanba sá? Ita hatete, bainhira ita ko’alia turizmu maibé alende ita seidauk prepara didi’ak hodi atende ita-nia bainaka sira ne’ebé mai tanba turista sira nia hakarak hatene hahan típiku rai idaidak nian”, esplika.

“Objetivu ida ne’e mak ami hakarak mai loke restaurante sira-nia hanoin atu oinsa komesa dadauk prepara aan, sira mós tenke promove aihan lokál iha sira-nia restaurante”.

Diretora Maria realsa, atu nune’e ita timoroan sira bele hetan osan liliu iha povu agrikultór sira, sira mós bele hetan rendimentu liuhusi promove aihan lokál ne’e.Depois, liliu mós atu konvida, haka’as tan ita-nia povu agrikultór sira.

“Ita haree katak kuandu ita hothotu uza kualidade, hanesan gastronomia ka aihan lokál ba ita-nia restaurante produsaun mós tenke maka’as tanba ita-nia nesesidade,” salienta diretora ne’e.

Ho formasaun ne’e, nia espera katak oinsa MTAK serbisu hamutuk ho emprezáriu ne’ebé iha ligasaun liu ho área negosiu para fó motivasaun nafatin hadi´a kualidade iha futuru mai hodi ita-nia atendimentu ne’e di’ak sei atrai turista sira mai ita-nia rain.

“Ita lalika ba dook lai, karik dehan ita dada turista sira husi rai dook mai primeiru ita sente di’ak ona. Otomatikamente ema seluk mós seiu sente di’ak,” konklui diretora ne’e.

Partisipante formasaun, Antoninho Maria Neto Mok, na’in ba restaurante Vitória Café, Munisípiu Baucau hateten katak sente di’ak ho formasaun ne’e.

“Formasaun hanesan ne’e, labele para iha ne’e de’it maibé tenke loke nafatin oportunidade, formasaun hanesan ne’e, ba negosiante sira,” Antoninho haktuir ba Ajénsia Tatoli.

Timor-Leste dadaun ne’e prepara aan tama ASEAN (Association of South East Asian Nation) tanba ne’e sei iha komptesiasaun maka’as ho nasaun seluk no turista mós sei bele mai aumenta. Ho nune’e, nia sujere ba governu atu halo mós estudu komparativu ho rai seluk husi negosiante sira iha area restaurante nian.

“Governu tenke iha inisiativa di’ak, loke oportunidade ba timoroan, loke bolsu estudu kona-ba turizmu nian ba ita timoroan sira rasik, atu nune’e ita timoroan bele ba estudu iha nasaun seluk, foti ema nia esperiénsia hodi nune’e bele mai aplika iha ita-nia nasaun,” Antoninho sujere.

Partisipante ba formasaun gastronomia ne´e mai husi jerente restaurante sira iha munisípiu 13. Tema ba formasaun ne’e mak: “Gastronomia Sabores de Timor-Leste” organiza husi MTAK.

Jornalista: Rafy Belo

Editora: Rita Almeida

 

HUSIK IDA HATÁN