Movimentu Feto Deklara Apoiu Kandidata Ângela Freitas

0
43

DILI, (ANTIL) – Movimentu Feto Timor-Leste (MFTL), Kinta, (2/3) iha Bairo Formosa, deklara apoiu kandidata Maria Ângela Freitas da Silva ba Prezidente Repúblika périodu 2017 to’o 2022.

Apoiu ne’ebé halo liuhosi konferénsia imprensa iha sede kandidata, ho razaun orgullu ho feto ida ne’ebé iha korajen no fiar-án avansa ninia kandidatura.

“Tempu to’o ona atu hatudu sira-nia kualidade ba partisipa iha prosesu demokrátiku hodi kontribui ba feto nia estratéjia liuhusi programa ne’ebé bele dezenvolve nasaun Timor-Leste,” deklara Judite Ximenes nu’udar portavoz movimentu ne’e.

Istorikamente, luta ba ukun rasik-án hetan partisipasaun másimu husi feto sira tanba ne’e, eleisaun prezidensiál ba dahaat fó espasu ona ba feto sira hodi tau hanoin “se la’ós feto, sé tan, se la’ós agora, bainhira tan”, Judite Ximenes hanesan mos Prezidenti Board Rede Feto.

“Lema ida ne’e, feto hotu presiza kuda iha feto sira-nia hanoin no fuan katak feto sira avansa nu’udar inan ba nasaun nomós nu’udar inan ba povu Timor-Leste tomak hodi hatan oan sira nu’udar povu Timor-Leste nia halerik no ho feto sira-nia partisipasaun mak bele hametin demokrásia iha Timor-Leste”, haklaken MFTL.

Ho firmeza, MFTL sei promove kandidata Ângela Freitas nia perfil no programa prioridade balun ne’ebé foka liu ba feto, joven feto no labarik sira-nia nesesidade.

Ho deklarasaun apoiu ne’e, kandidata Ângela Freitas hateten, apoiu diretamente ka indiretamente hatudu, to’o ona tempu, feto mós bele.

“Feto nia partisipasaun iha prosesu dezenvolvimentu boot tebes, dezde inísiu tempu rezisténsia to’o ukun rasik-án i agora to’o ona tempu atu ba konstrusaun estadu,” kandidata ho númeru neen ne’e hatutan. 

Jornalista: Rafy Belo / Editora: Rita Almeida

HUSIK IDA HATÁN