MKIA Diversifika Indústria Tais

0
91
Indústria Kreativa, Foto Espesiál.

DILI, (TATOLI)- Ministériu Komérsiu, Indústria no Ambiente (MKIA) ho PT. Archa Indonesia liuhusi kooperasaun ne’ebé hala’o durante tinan ida, fó kapasitasaun ba soru-tais na’in sira ho atividade oioin hodi hasa’e sira-nia kapasidade hahú husi hili matéria prima hanesan kabas, fó kór no halo produtu kreativu.

Diretór Jerál Indústria no Kooperativa, António da Costa hatete, atividade ne’e hahu ho estudu iha tinan 2016 no kontinua mai 2017 iha munisípiu 13 hodi fó treinamentu no atinji diversifikasaun indústria tais.

“Halo akompañamentu ba grupu soru-tais atu nune’e kontinua hadi’a sira-nia kualidade tais”, dehan António iha Novo Turismo, horisehik.

Programa ne’e, atu oinsá transforma tais sai nu’udar indústria ida ne’ebé ema hotu presiza tanba antes ne’e hanesan de’it produtu kulturál. MKIA identifika ona grupu 71 sai trajetu atu dezenvolve indústria tais no 27 hahú ona introdús teknolojia ne’ebé empreza Archa lori mai Timor-Leste.

MKIA no PT. Archa halo atividade implementasaun programa ho baze avaliasaun no peskiza ne’ebé identifika problema barak mosu fó kór ba tais, motivu no oinsá tais ba merkadu doméstiku no internasionál.

“Nu’udar peskizadór, husi aspetu fó kór, soru-na’in sira lamenta kona-ba kór ne’ebé sai, nune’e Archa halo formula reseita tanba halo ona diagnóstiku depois forma sub-eskenáriu kapasitasaun atu hato’o ba soru-na’in sira”, hatete Diretóra PT. Archa Indonesia, Anjar Budiyani.

Formasaun ne’e MKIA lori peritu sira husi Indonézia hodi hanorin tékniku fó kór ne’ebé rezulta kór naturál 29 no kór naftol iha kompozisaun 12 nomós kór lima ne’ebé rezulta kór direta inklui prodús motivu tais 13 hahú husi klásiku to’o modernu. Iha partisipante ema na’in-30 husi munisípiu 12.

Aleinde ne’e, fó treinu ba ema 25 kona-ba protudu ekonomia kreativu baze tais atu hasa’e abilidade soru-na’in, kualidade relasiona ho aspetu dezeñu, tipu nomós prosesu produsaun ne’ebé apár ho dominasaun demanda merkadu hanesan produtu moda.

Ikus, halo akompañamentu hasa’e kreatividade iha prosesu soru no hariku motivu tais, partisipa husi ema na’in-11 atu halo tais ho motivu kontemporanea no uza kabas oioin ho fó kór naturál, sintétika no rezulta motivu futus hitu no tais sotis kontemporanea haat ne’ebé relevante.

Atividade ba formasaun, peskiza no kria website, livru no disko Audio Vizuál ne’e gasta osan U$ Rihun 450. (Jornalista : Maria Auxiliadora/Editor : Alberto Alves)

HUSIK IDA HATÁN