Dosente Nain 2 UNTL Sai Adidu Edukasaun iha Rai Li´ur

0
336
Vise-ministru edukasaun I, Abel da Costa Ximenes. Foto: Rafy Belo

DÍLI, (TATOLI) —Governu Timor-Leste liuhusi Ministériu Edukasaun (ME) nomea profisionál Universidade Nacional Timor Lorosa´e (UNTL), ne’ebe durante ne’e haknar an nudar dosente iha universidade ne’e hodi sai nu´udar adidu edukasaun iha rai li´ur, hodi servisu iha Embaixada Timor-Leste nian iha Indonézia no Xina.

Profisionál na´in rua ne´e mak eis-pro-reitora asuntu kooperasaun no bilaterál, Lígia Tomas Correia no Dosente Fakuldade Siénsia Sosiál (FSS), Flavia Martins.

Ho nomeasaun ne´e, Vise-ministru I, Ensinu Sekundáriu no  Superiór, Abel da Costa Ximenes perante profisionál Komunikasaun Sosiál sira iha Salaun Ministériu Solidaridade Sosiál (MSS), Caicoli, Díli, Segunda (27/03/2017) fó votus para sira hodi bele halo serbisu ho didi´ak.

“Serbisu ho integridade, ho responsabilidade i dedikasaun para depois lori Timor-Leste nia naran, halo serbisu di´ak iha rai li´ur,” hateten Vise-ministru edukasaun ne´e.

Vise ministru Abel Ximenes mós husu ba adidu edukasaun sira para serbisu di´ak ho embaixadór, ho pesoál ne´ebé iha embaixada ka konsuladu tanba sira ne´e ba la´ós serbisu keta-ketak para reforsa ekipa embaixada ou konsuladu iha rai li´ur.

“Depois sira sei halo atividade oioin, halo akonsellamentu ba estudante sira, depois halo relatóriu mai Ministériu Edukasaun,” nia akresenta.

Governu alende nomea adidu edukasaun na´in rua ne´e, nomea mós asistente na´in rua liliu iha Indonézia mak hanesan João Batista, sei hala´o kna´ar iha konsuladu Timor-Leste nian iha Kupaun, Indonézia.

No seluk, Agostu de Jesus sei ba iha Jakarta. Entretantu kona-ba Filipina nian, sei iha prosesu.

Vise-ministru Abel Ximenes husu mós ba adidu, asistente adidu para serbisu di´ak ho embaixadór, ho pesoál ne´ebé iha embaixada ka konsuladu.

Adida edukasaun ba Indonézia, Lígia Tomas Correia hateten, ho esperiénsia ne´ebé mak nia iha durante ne´e, liliu fó atendimentu liu ba bolseiru, fokus ba dosente UNTL, agora tempu ne´ebé fó oportunidade ba nia, atu serbisu nu´udar adida iha Indonézia atu atende ba estudante no timoroan hotu iha Indonézia laran. “Ne´e la´ós buat foun mai ha´u,” nia garante.

Nia mós akresenta, serbisu ne´ebé nia halo antes ne´e la iha diferénsia ho serbisu ne´ebé nia sei asume, sei ajusta de´it ho buat balun ne´ebé presiza atende kle´an liutan.

“Ha´u-nia parte ha´u sente katak ho kompeténsia ne´ebé ha´u iha durante 5 anos hanesan pro-reitora iha asuntu kooperasaun, ha´u sente ajuda tebes ha´u bele serbisu iha kargu foun nu´udar adidu,” hateten dosente Fakuldade Agrikultura ne´e.

Hanesan adida, nia haktuir, ho oinsa buka solusaun hodi rezolve problema sira ne´e, tanba nia parte haree katak dalabarak problema ne´ebé akontese, problema barak liliu iha aspetu sosiál, oinsa tratamentu ba dokumentu estudu nian.

Tanba ne´e, ba nia, embora feto maibé iha korajen nafatin kolabora ho ministériu ne´ebé mak relevante, ho estudante sira mós, no buka soluasaun ba problema ne´ebé mak enfrenta.

“Ita iha mundu, buat problema ne´e normál, hothotu sempre enfrenta. Problema ne´e, ita tenke iha korajen nafatin, atu buka solusaun ba problema ne´ebé mak sempre enfrenta,” nia enkoraja.

“Solusaun sempre iha ba problema se ita iha boa vontade no korajen atu bele trata problema sira ne´e,” konklui adidu edukasaun ba Indonézia.

Entretantu kona-ba kontratu, Vise-ministru edukasau I, Abel da Costa Ximenes informa, kontratu ba adidu no asistente edukasaun ne´e, tinan ida-ida de´it, bainhira halo serbisu di´ak tuir avalisaun ME nia, bele hanaruk ba tinan rua ka tolu tan.

Jornalista: Rafy Belo / Editor: Gantry Meilana

HUSIK IDA HATÁN