LUGU : Igreja no Estadu Tenki Hamutuk

0
31

DILI, (ANTIL) – Kandidatu Prezidenti Repúblika ba periodu 2017 to’o 2022, José Luis Guterres, Sesta, (3/3) iha Bidau Lecidere bainhira hasoru malu ho Bispu Diozese Dili, Don Virgilio do Carmo Guterres, SDB, husu atu igreja no estadu hamutuk hodi haree ba kestaun sira hanesan jogu ilegais, prostituisaun no krime organizadu sira.

”Tanba valor morál, estadu no igreja tenke hamutuk maske iha separasaun. Estadu tenki eduka beibeik povu liuhosi igreja”, Luis Guterres hatete iha ninia hasoru malu ho ulun bo’ot Diozese Dili.

Hasoru malu ne’e, kandidatu aprejenta ninia preokupasaun kona-ba limitasaun kampu servisu ba joven sira nomos kestaun sira seluk ne’ebé povu no nasaun ne’e hasoru.

Entretantu iha intervista ho ANTIL, eis Vise Primeiru Ministru ne’e konfesa, situasaun rai laran nomos rai liur mak enkoraja nia atu kandidata-án ba dala rua.

Tuir eis Ministru Negosiu Estranjeiru no Koperasaun nia observasaun, foin sa’e lubun balun seidauk iha kampu servisu no povu nia moris kontinua hasoru difikuldade sira.

Buat ne’ebé benefisia direitamente ba povu hanesan bee, uma no laiha servisu hosi joven sira kontinua sai preokupasaun, katak atuál deputadu hosi bankada Frente Mudansa ne’e.

Haree ba problema sira ne’e, ho esperensia iha nível governu nomos diplomata. Atuál prezidenti partidu Frente Mudansa ne’e dehan, eleisaun hanesan tempu oportunu atu husu povu ninia disponibilidade hili nia oinsá bele fó kontribuisaun ba nasaun  no povu ninia moris di’ak.

Seluk mak rai ida ne’e ninia direitu internasionál, liliu tasi Timor, karik eleitu hanesan xefi estadu, kandidatu ne’ebé moris iha Luka, munisípiu Viqueque ne’e dehan, sei fó laran tomak atu apoiu prosesu negosiasaun ne’ebé lidera hosi Kay Rala Xanana Gusmão.

Mesmu situasaun internasionalmente difísil maibé Timor-Leste hatene ninia pozisaun atu la’o oinsá, katak tan eis membru Comite Centrál da Fretilin.

Atu atrai povu nia votu, ninia ekipa sei halo kampaña hosi uma ba uma (door to door) hodi esplika programa polítika nomos halo dialogu ho populasaun.

Atividade loron dahuluk hosi kandidatu ne’e mak halo misa iha semináriu maior Balide Dili hodi agradese ba hanorin nain sira hanesan eis seminarista, hasoru malu ho Bispu Diozese Dili, halo dialogu ho komunidade Metinaru no planu sei halo mos dialogu ho komunidade iha área Bekora. (jornalista: Rita Almeida/Editor: Alberto Alves )

HUSIK IDA HATÁN