Limitasaun Orsamentu, PD Laiha Esforsu Maka´as ba Kandidatura Kalohan

0
44

DILI (ANTIL)—Prezidenti Partidu Demokrátiku (PD) Eleitu, Mariano Assanami Sabano hateten sira sei la halo esforsu maka´as ba Kandidatu PD, António da Coceição “Kalohan” tanba kestaun limitasaun orsamentu.

“Ami sei la halo esforsu hanesan partidu seluk halo tanba PD iha limitasaun orsamentu. PD fiar de´it inan-aman sira halo kampaña iha ida-idak nia fatin, knua, aldeia, para fó vitória ba Kalohan, fó vitória ba Timoroan sira no fó vitória ba Timor-Leste,” Assanami hato´o argumentu ne´e liuhusi ninia deskursu hafoin eleitu hosi kongresista sira iha Terseiru Kongresu PD ne´ebé hala´o iha Sentru Konvensaun Dili (CCD), Dili, Segunda (27/2).

Tuir nia katak serbisu atu fó vitória ba kandidatu PD hanesan serbisu todan ida. Tanba ne´e, nia informa, la´ós de´it estrutura maka haka´as án maibé inan-aman hosi aldeia to´o munisípiu tenki hakaas án. Hakaas án iha merkadu, toos, natar no iha fatin ne´ebé de´it para lori Kalohan ba prezidenti.

“Serbisu boot ida iha ita nia oin maka oinsá ita lori kandidatu hosi PD, António da Conceição ne´ebé hanesan sekretáriu jerál eleitu ba Prezidenti repúblika,” Assanami tenik ba kongresista sira ne´ebé mantein iha kongresu.

Nu´udar prezidenti repúblika, nia afirma, Kalohan sei garante mandatu ne´ebé maka Konstituisaun fó, garante páz no estabilidade, garante funsionamentu instituisaun Estadu nian no garante koezaun sosiál timoroan ne´ebé maka mosu kle´ur tebes ho konflitu oi-oin.

Jornalista: Xisto Freitas / Editor: Gantry Meilana

HUSIK IDA HATÁN