Komando Alerta, PNTL Tenki Serve Povu Ho Dignu

0
93
FOTO TATOLI : Antonio Dasiparu

DILI (TATOLI)—Komandante Jerál Polísia Nasionál Timor-Leste (PNTL), Komisariu Julio Hornay alerta atu membru PNTL serve povu ho dignu no respeitu, tanba sei iha elementus PNTL balun mak hafo’er instituisaun nia naran.

“Aprende ho buat ne’ebé mak liu ba hodi atinji prioridade ne’ebé mak difini ona. Tinan 17 ona PNTL hamrik, iha buat barak mak ita halo, maibé iha buat balun mak individu PNTL halo hodi hafoer imajen PNTL nian,” Julio Hornay hato’o iha nia diskursu ba selebrasaun aniversariu tinan 17 PNTL nian, iha Akademia PNTL, Comoro, Segunda (27/03/2017).

Dezenvolvimentu PNTL durante tinan 17 nia laran la haketak an ho sosiedade, maibé sempre hamutuk ho sosiedade hodi buka defende legalidade demokratika no garante seguransa ba sidadaun sira nian, la iha partidu inklui la inklina an iha grupu ida ne’e ou ida ne’eba.

Ema numeru ida iha instituisaun seguransa nian ne’e rekonese katak durante tinan 17 nia laran, PNTL iha duni mudansa iha area oi-oin, hanesan rekursu materiais, ekipamentu transpórte, rekursu úmanus no bein estar ba membrus nian.

“Mudansa hirak ne’e akontese tanba apoia makas hosi governu liu hosi Ministériu Interior. Ami fi’ar katak, iha oin mai sei la’o di’ak liu tan,” Julio Hornay promete.

PNTL nia misaun klaru iha Konstituisaun RDTL, Artigu 147 (Polisia ho forsa seguransa ) 1) Polisia tenke defende legalidade demokratika no garante seguransa interna ba sidadaun hotu no la inklina ba partido. 2) Prevensaun krime tenke baseia ba respeitu direitus humanus. 3) Lei maka determina regra no regulamentu  ba polisia no forsa seguransa no forsa sira seluk.

Membru PNTL hotu-hotu tenki hala’o ho responsabilidade maksimun tuir lei Organika PNTL ne’ebé determina kompetensia hahú hosi nivel komandate to’o soldadu, saida mak tenki halo, no saida mak ita la bele halo.

Julio Hornay koalia mos katak, los duni durante ne’e iha duni individu PNTL ne’ebe hafoer imajem instituisaun ne’e, maibe Komandu mos sei la tolera hodi kontinua fo sansaun ba individu refere.

Komandu iha tinan 2016 aplika mós regras ba membru indisiplina hanesan 50 penas suspensaun, 8 penas ba multa,  30 penas represaun eskrita 30, no 16 penas proposta dimisaun.

Jornalista: Manuel Pinto / Editor: Gantry Meilana

HUSIK IDA HATÁN