DÍLI, (ANTIL)—To’o 2017 ne’e, governu Timor-Leste liuhusi Ministériu Edukasaun (ME) konverte ona Ensinu Sekundáriu Jerál (ESJ) ba Ensinu Tékniku Vokasionál (ETV) hamutuk 50 hodi prepara rekursu umanu ne’ebé kualidade no kompetente.
Ministru Edukasaun, António da Conceição hateten, iha ETV-Becora, Díli, Segunda (27/2) katak rehabilitasaun ETV-Becora, Díli husi KOICA (Korean International Cooperation Agency) husi Korea do Sul ne’e la’ós konversaun maibé hanesan polítika fortalesimentu ba eskola ne’e hodi bele dezenvolve edukasaun iha ensinu tékniku vokasionál nian.
Rehabilitasaun ne’ebé KOICA halo ne’e alende edifísiu eskola, inklui mós apoiu fasilidade laboratóriu prátika ba departamentu sira hanesan elektrónika, elektrisidade, konstrusaun sívil, mekániku automóvel no mekániku produsaun nomós informatika. “Pratikamente responde ba nesesidade Timor-Leste nian,” nia hatutan.
Governante ne’e mós explika katak Timor-Leste mós labele izola aan ho kooperasaun sira tanba ida ne’e mós importante. “Timor mós nafatin halo instrumentu ba diplomásia ida ezisténsia iha nasaun ukun rasik aan hodi bele halo kooperasaun ho sira (KOICA-Korea),” nia afirma.
Entretantu, durante halo observasaun ba laboratóriu sira ne’ebé eziste iha ETV-Becora, Ministru António da Conceição husu ba estudante sira atu aproveita buat hotu ne’ebe fasilita husi KOICA-Koreia ne’e hodi bele halo buat ruma di’ak liu.
“Buat sira ne’e hotu mak bele kria fali empregu ba ita. Ne’ebé, ha’u hein iha imi-nia eskola bele aproveita tékniku hotu atu nune’e imi mós, ba fali li’ur ne’e atu kria rasik serbisu, labele hanoin dehan estadu ne’e sei halo buat hotu,” nia enkoraja.
Ministru ne’e realsa tan katak ho skill ne’ebé di’ak, atitude responsabilidade estudante sira bele sai espesialista ba rai Timor-Leste.“Ha’u fiar katak sei fó kontribuisaun maka’as ba dezenvolvimentu ensinu tékniku no ba dezenvolvimentu sosi-ekonómiku nasaun nian. Serbisu di’ak no kontinua ho atitude responsabilidsade,” tenik ministru.
Ministru António apela mós ba estudante, inan-aman inklui komunidade sira hodi bele tau-matan lisuk ba fasilidade ne’ebé governu Korea do Sul fó liuhusi KOICA hodi bele garante kualidade edukasaun.
Ministro mós husu ba profesór, inan-aman sira hola responsabilidade atu bele ta’u aas prioridade nasaun nian iha area edukasaun.
Nune’e mós, Embaixadór Koreia do Sul ba Timor-Leste, Kim Ki Nam hein katak eskola tékniku vokasionál ne’e sei garante ambiente estudu ne’ebé di’ak liu iha Timor-Leste nomós husu ba estudante sira atu aproveita didiak oportunidade neb’e hetan
Embaixadór Kim Ki Nam mós katak mestre sira-nia dedikasaun mak sei sai hanesan xave ida ba dezenvolvimentu iha futuru mai. “Edukasaun mak hanesan aset nasaun nian. Edukasaun mak solusaun ba problema,” nia konklui.
Iha fatin hanesan Diretór KOICA ba Timor-Leste, Hyeoncheol haktuir, iha 2013 KOICA apoia ona ETV ho fundu USD milaun Sia hodi dezenvolve livru didaktiku no livru ensinu formasaun nian inklui rehabilita edifísiu 18 (7.400 m2) hodi prepara kondisaun ne’ebé di’ak atu nune’e aprende teknolojia ho di’ak liu tan.
Diretór eskola, Francisco Guteres agradese ba apoiu ne’e no informa katak atu jere no garante fasilidade sira ne’e edukadór sira husi eskola refere ba ona tuir formasaun kona-ba oinsa asegura no kuidadu materiál prátika sira ne’e.
Eskola Tékniku Vokasionál, Becora harii iha tinan 1987 husi governu provínsia Timor Timur (tempu Indonézia) ho naran Sekolah Teknik Menengah (STM), Díli no nu’udar ensinu públiku úniku. Hafoin indepedénsia, 2017 ne’e, ETV-Becora, Díli, rejistu ona estudante na’in 990.
Kona-ba apoia KOICA nian, antes ne’e, KOICA ho V Governu Konstitusionál Timor-Leste liuhusi Ministériu Edukasaun asina Memorandum of Understanding (MoU) iha 2013, ne’ebé altura ne’ebá lidera husi ministru Bendito dos Santos Freitas. Iha konteúdu MoU ne’e la’ós de’it ba ETV maibé ba teritóriu nasionál tomak.
(Jornalista: Rafy Belo/Editor : Alberto Alves)
