Klubu 13 Sei Partisipa Jogu Segunda Divizaun

0
27

DILI, (ANTIL) – Jogu Primeira Divizaun Liga Futeból Amadora (LFA) sei hahú aban, Tersa (7/3), iha Estádiu Munispál Dili. Jogu segunda divizaun ne’e partisipa hosi klubu hamutuk sanulu resin tolu (13).

Klubu Nagardjo FC no DIT FC maka sei halo abertura ba jogu ne’e no sei hala’o dala tolu kada semana hanesan Tersa to’o Kinta. Durasaun ba jogu refere durante fulan neen (Marsu-Agustu) no sei hala’o ba dala 72.

Maske estádiu iha hela faze konstrusaun hosi Kompañia Marina Lda, maibé Sekretáriu Ezekutivu LFA, Sergio Hornai hateten, iha espasu para bele realiza jogu ne’e.

Tuir nia, úniku Estádiu Dili maka bele hala’o jogu ne’e, estádiu sira seluk okupa ona hosi jogu primeira divizaun.

Sergio informa, LFA seidauk bele aplika tikete ba adeptu sira tanba faze konstrusaun, nune’e seidauk iha kondisaun adekuadu ba asisti na’in sira.  “Ita seidauk bele aplika tikete, ita seidauk prepara kondisaun di’ak ba adeptu sira”, ba ANTIL via telefónema iha Dili, Segunda ne’e.

Ohin tuku 15:30 liu-ba, Sekretáriu Ezekutivu LFA ho nia estrutura hala’o inkontru ho Komandante Polísia Munisípiu Dili, Pedro Belo hodi ko’alia kona-ba seguransa ba jogu segunda divizaun LFA.

Klubu sira segunda divizaun maka hanesan Nagardjo FC, DIT FC, Café FC, Cablaki FC, YMCA FC, Assalam FC, Lika-Lika FC, Santa Cruz FC, Ultramar FC, Aitana FC, União FC, Sporting de Timor no Benfica Dili FC. (jornalista: Xisto Freitas; editora: Rita Almeida)

HUSIK IDA HATÁN