KHUNTO no PD Aliadu Estratéjiku

0
249

LOSPALOS (ANTIL)—Partidu Klibur Haburas Unidade Nasionál Timoroan (KHUNTO) hanesan aliadu estratéjiku Partidu Demokrátiku (PD) ba eleisaun parlamentár mai ne´e.

“Partidu Demokrátiku no KHUNTO hanesan partidu joven, tan ne´e to´o ona tempu atu ita bele la´o hamutuk no hametin ita nia baze polítika. Ita nia relasaun no komunikasaun polítika ne´e labele to´o de´it iha eleisaun prezidensiál. Ita tenki kontinua ita nia relasaun ida ne´e to´o iha eleisaun parlamentár,” Sekretáriu Jerál Partidu KHUNTO, José Agostinho da Silva hato´o informasaun ne´e liuhusi ninia intervensaun iha abertura kampaña Kandidatu Prezidenti Repúblika periodu 2017-2022, António da Conceição “Kalohan” iha Kampu Futeból Postu Administrativu Lospalos, Munisípiu Lautém, Sesta (03/03/2017).

Nia dehan katak polítika ne´e dinámiku, tan ne´e tenki halo relasaun di´ak ho partidu hotu-hotu.

Agostinho informa, KHUNTO apoiu kandidatu Kalohan tanba Kalohan parte hosi jerasun foun, espíritu foun, motivasaun foun, vizaun foun no misaun foun, katak atu hatutan saida maka Aman fundadór nasaun sira hahú ona.

“António Kalohan hanesan kader hosi Partidu Demokrátiku maibé nia mós jerasaun foun ida. Tanba ne´e, ita jerasaun foun prontu ona para bele hatutan jerasaun tuan sira nia mehi. António iha jeitu ba ida ne´e,” nia tenik.

Iha semana hirak liu-ba, nia haktuir, nia rasik lidera membru Komisaun Polítika balun hosi KHUNTO ba iha sede Kampaña Dr. Francisco Guterres Lú-Olo bazeia ba orientasaun hosi Konsileiru Superiór Partidu KHUNTO, José dos Santos “Naimori” Bucar no Prezidenti KHUNTO, Armanda Berta dos Santos, ho objetivu atu rona vizaun no misaun Kandidatu Lú-Olo kuandu eleitu ba prezidenti repúblika.

Nia informaa, sira nia prezensa iha sede Kampaña Lú-Olo konsege hamosu polémika katak  sira atu fó apoiu ba kandidatu Lú-Olo. Nia subliña, sira nia prezensa la hola desizaun katak atu fó apoiu ba kandidatu Lú-Olo.

“Hafoin ami rona, tetu no análiza, ikus mai hatúr desizaun polítika nu´udar desizaun koletivu partidu ninian maka ami anúnsiu iha 25 Fevereiru katak KHUNTO apoiu ba kandidatu António Kalohan,” Agostinho esplika.

Jornalista: Xisto Freitas / Editor: Gantry Meilana

HUSIK IDA HATÁN