Kandidatu PR Nain 8 Kompromete Hakribit Violénsia

0
39

DILI, (ANTIL) –  Representante Kandidatu Prezidente Repúblika (PR) Periódu 2017-2017, Antonio da Conceicao hateten, Kandidatu nain ualu prontu hodi  garante páz no estabilidade durante kampañia no eleisaun prezidensiál iha 20 marsu 2017.

Antonio da Conceicao liu husi komprimisu ba dame hateten, sei mantein páz no dame entre kandidatura nain hitu seluk hodi fo susessu ba eleisaun prezidensiál.

‘’Iha loron jornada ba páz ne’ebé ita hala’o, hamutuk ho kandidatu sira seluk, ami promete hodi ami nia naran atu ami hakribit violénsia, ami nia liafuan sei promove páz entre ami,’’ hateten Antonio da Conceicao iha atividade jornada ba páz iha Jardim Largo Lesidere Dili, Kinta (02/03/).

Representante kandidatura hateten, sei tau interese nasaun aas liu interese partidu no grupu durante kampañia prezidensiál.

‘’Ami hotu sei buka duni moris hakmatek ba ema hotu, hodi haree ba interese nasionál no saida maka ita nia fundadór sira mehi ona ba ita nia nasaun atu moris hakmatek no Timor nia ema sira moris di’ak,’’ Antonio da Conicao dehan.

Iha Tempu hanesan, Eis Prezidente Repúblika nomos Premiadu nobel ba páz Jose Ramos Horta husu Kandidatu Nain ualu atu kontinua garante páz no estabilidade durante kampañia prezidensiál.

‘’Ha’u sei la tauk iha violénsia ka lae? tamba lideransa sira ida-idak iha responsabilidade, militante no apoiante partidu ida-idak iha obrigasaun atu rona mensazen husi sira nia lider sira atu labele halo violénsia,’’ dehan Horta.

Ramos Horta hateten fo konfiansa ba kandidatu sira no partidu polítiku hodi garante páz no estabilidade durante eleisaun prezidensiál no parlamentár.

‘’Ha’u hatene no koñese sira ida-idak iha responsabilidade no komitmentu  ba dame ba disiplina hodi garante dame no estabilidade,’’ dehan Horta.

Jose Ramos Horta hateten, eleisaun jerál 2017 sai sasukat ba povu no lideransa Timor-Leste atu haburas páz no demokrásia hodi apoiu prosesu dezemvolvimentu.

Eis PR ne’e afirma, 2022 jerasaun antigu 75 sei entrega  ukun ba gerasaun foun sira  hodi  ukun nasaun ho responsabilidade.

‘’Tinan 2022, jerasaun foun sei kaer todan  ka kontinua misaun ne’ebé ami hahú iha 1975 tuir Nicolau Lobato no Francisco Xavier do Amaral,’’ hateten Horta.

Ekipa kobertura / Editor: Gantry Meilana 

HUSIK IDA HATÁN