Kandidatu PR “Amorim Vieira” Dezenvolvimentu Ekonomia Tenke Sustentavél

0
51

Dili, (ANTIL) –  Kandidatu Prezidente Repúblika, Amorim Vieira hateten, dezenvolvimetnu ekononomia Timor-Leste tenke sustentavél atu bele fo rezultadu direita ba sosiedade.

“Ha’u kandidata an tanba iha motivasaun ne’ebé ha’u haree ba dezenvolvimentu ekonomia ne’ebé balun la’o no balun ladauk. Importante tenke kontribui hodi dezenvolve ekonomia nasaun nian, sai savi ba susesu sosiedade nian,” informa Kandidatu Prezidente Repúblika, Amorim Vieira ba ANTIL iha Ótel Plaza foin lalais ne’e.

Xavi ba dezenvolvimentu moris povu nian mak tenke promove setór ekonomia, maske kna’ar prezidente limitadu maibé oinsa mak servisu hamutuk atu hadia povu nian moris. Tanba prezidente repúblika nia responsabilidade atu haree karik wainhira promula Orsamentu Jerál Estadu (OJE) iha impaktu ba mudansa sosiedade ga lae, bele fo benefisiu ou la’e.

“Ha’u foti desizaun atu promulga ou la’e ba Orsamentu Jerál Estadu ne’ebé liga ba dezenvolvimentu ekonomia Timor-Leste, depende ba impaktu direita ba moris povu nian tanba prezidente hili direita hosi povu no presiza responde ba nesesidade povu nian,” dehan Kandidatu PR Amorim

Kandidatu PR Amorim akresente, nasaun presiza iha dezenvolvimentu no hetan benefisiu direita hosi povu. Timor-Leste ne’ebé di’ak tenke justu no fo oportunidade ba ema hotu atu partisipa dezenvolvimentu nasionál. Tenke haree prinsípiu ekonomia merkadu livre tanba Xineza sira komesa nakonu iha fatin hotu-hotu.

“Dadaun ne’e iha Hudi-Laran komesa ema bolu sai Xina laran, maibé molok ida ne’e mosu tenke antisipa atu ita labele sai vítima ba independensia,” dehan nia.

Wainhira dezenvolvimetu la’o di’ak iha kontestu ekonómiku, tenke servisu hamutuk ho povu no sosiedade sivíl sira liu hosi orgaun soberania haat hanesan prezidente repúblika, parlamentu nasional, judisiariu no governu.

Tuir kalendariu atividade festa demokrásia, Kandidatu PR, Amorim Vieira hateten, iha 3 to’o 17 Marsu sei halo kampañia eleitorál, tanba ne’e, modelu kampañia ne’ebé sei estabeles mak dialogu populár atu koalia ho inan aman sira atu hatene sira nia nesesidade moris.

Entretantu, orariu kampañia submete ona ba Comissão Nacional das Eleições (CNE) atu sira bele halo aprovasaun, hafoin ita sei hahu kampañia hosi Baucau, Lospalos, Viqueque, Manatuto no ultimu iha Dili, “Ema hakarak Jesus nia liafuan tanba kapernaun fatin ida at los maibé jesus hatene nia ema iha ne’eba nia tenke to’o, Manan ou la’e povu mak sei deside, la’os tanba ho ambisaun” dehan nia

Iha kampañia eleitorál sei iha programa prinsipál tolu ne’ebé sai prioridade mak dezenvolvimentu ekonomia, setór justisa no kombate korupsaun.

Bazeia ba Kontituisaun Repúblika Demokratika Timor-Leste (RDTL) iha artigu 65 ne’ebé koalia kona-ba kampañia eleitorál hala’o tuir prinsipiu liberdade ba propaganda eleitorál, oportunidade no tratamentu hanesan ba kandidatu hotu-hotu, imparsialidade nain ulun boot sira kona-ba kandidatura no transparénsia no fiskalizasaun sura votu nian.

Atu asume pasta prezidente repúblika bazeia konstituisaun RDTL artigu 74 hateten, prezidente repúblika mak xefe estadu, simbolu no garante independensia nasionál no unidade estadu nian, no instituisaun demokrátika sira nia funsionamentu regulár, prezidente repúblika mak komandate a’as liu forsa armada nian.

Jornalista: Zezito Silva / Editor: Gantry Meilana

HUSIK IDA HATÁN