Joga Hasoru Carsae FC, Jogadór Prinsipál AS Ponta Leste La Tún

0
62
Ekipa AS Ponta Leste

DILI TATOLI—Jogadór prinsipál na´in rua hosi AS Ponta Leste hanesan Ricardo Maia (9) no Sota Tokonaga (10) sei la tún joga hasoru ekipa Carsae FC iha Estádiu Munisipál Maliana, Sábadu (25/3).

Razaun la tún tanba avansadu prinsipál AS Ponta Leste (Ricardo) aleija no médiu avansadu (Sota) viajen ba estranjeiru. Ricardo aleija bainhira joga hasoru Karketu Dili FC semana kotuk iha Estádiu Munisipál Baucau.

Treinadór AS Ponta-Leste, Eduardo Pereira hateten agora dadauk sira prepara án di´ak liu atu hasoru Carsae FC. Nia hatutan, maske jogadór prinsipál na´in rua la partisipa maibé sei iha jogadór seluk atu troka.

 “Ha´u halo balansu ba SLB ho Carsae, SLB forte liu. Carsae mós forte maibé sira mós iha pontu fraku katak jogu dala hira liu-ba Carsae sempre impata ho klubu seluk no nunka manán,” nia haktuir.

Treinadór ne´e informa katak sira optimista manán Carsae maibé labele halo predisaun manán ho golu hira. Minutu 90 maka determina.

Iha parte seluk, nia dehan, joga iha Maliana klubu hasai despeza boot lahalimar maibé la konsege rekopera gastus. Ida ne´e akontese tanba adeptus laiha, tan ne´e billete la folin. Nia hateten, jestór klubu AS Ponta Leste sei hato´o karta ba iha Komisaun Liga Futeból Amadora (LFA) atu haree kona-ba problema ida ne´e. Nia prefere katak jogu segunda faze ne´e hala´o fali iha kapitál Dili. (Jornalista: Xisto Freitas)

 

HUSIK IDA HATÁN