Jere FFTL: Presidente ho SG Hetan Lejitimidade Husi Asosiasaun

0
138
Foto Espesial

DILI (TATOLI)—Figura Osorio Florindo nu’udar Prezidenti Federasaun Futeból Timor-Leste (FFTL) interino no Nelio Isaac Sarmento, nu’udar Sekretáriu Jerál la’ós “aúto-nomeasaun” maibé lejitimu tanba konfiansa ne’ebé sira iha, atribui hosi asosiasaun fútebol Timor-Leste nian.

Prezidenti Interinu, Osorio Florindo esplika, tuir dalan FFTL nian kargu sekretáriu jerál ne’e hili la’ós liuhosi kongresu no liu hosi reniaun executivu ne’ebé mak envolve asosiasaun sira.

“Kompetensia ne’e Prezidenti FFTL nian nafatin atu hili se mak sai Sekretáriu Jerál, tanba ne’e la presiza kongresu. Agora Prezidenti ha’u la’ós Prezidenti ida, maibé nafatin Prezidenti Francisco Kalbuady Lay, ha’u Interino,” Aktual Deputadu bankada FRETILIN ne’e esplika ba Agencia Noticioza Timor-Leste TATOLI, iha sede FFTL, Kampu Demokrasia, Sesta (31/03).

Osorio hatutan nu’udar Prezidenti Interino nia nunka autonumia nia an, maibé tanba aktual Prezidenti FFTL Francisco Kalbuady inkomoda ho servisu seluk no mós nia kondisaun saúde mak asosiasaun futeból municipiu sanulu resin tolu hamutuk ho asosiasaun arbitrazen no asosiasaun treinador diside iha FFTL hodi nia asume knaar interino atu prepara kongresu FFTL iha tempu besik.

Iha parte seluk Sekretáriu-Gerál Nelio Isaac Sarmento reforsa tan katak, FFTL nunka hanoin atu hili malu tur iha estruktura satan autonomia án.

“Ita hotu hatene momos los sekretáriu Jerál FFTL Amandio hetan sansaun hosi AFC ho FIFA. Haree ba situasaun hirak ne’e mak executivo sira FFTL nian diside foti ha’u nu’udar sekretáriu jerál hodi troka Amandio atu bele ajuda prepara kongresu FFTL nian,” aktual sekretáriu Estadu Komunikasaun Sosiál, Nelio Isaac Sarmento klarifika.

No dehan agora dadaun ne’e hamutuk ho Prezidenti Interino, Osorio Florindo prepara hela rejimento kongresu, agenda kongresu ho mós prosedimentu balun kona-ba oinsa mak atu simu tan membru foun ho kriteriu ne’ebé mak klaru.

“Loron kongresu nian ita hein Kongresu FIFA nian iha Bahrain fulan Maio nia laran,” Sekretáriu Estadu ne’e haktuir.

Kalbuady Atribui Hotu Kompetensia Ba Osorio

Osorio Florindo hatete, desizaun hili nia nu’udar Prezidenti Interino hetan konkordansia mós hosi FIFA, ho nune’e mak aktualmente kompetensia ne’ebé mak uluk atribui ba Kalbuady ohin loron entrega totál ba iha Osorio hodi hala’o jestaun FFTL nian to’o hetan lideransa foun ne’ebé maihosi rezultadu kongresu.

“Ba oin reniaun AFF, AFC, FIFA ha’u mak iha direitu votu la’ós Francisco Kalbuady Lay,” nia  relata.

Kona ba kogresu data fiksu seidauk bele marka tanba, aban (Sabdu) to’o loron 4, Maio,  Osorio Florindo tenki desloka ba Tailandia hodi partisipa reniaun kona-ba finansiamentu.

Loron 8-9, Maio nian sei partisipa tan kongresu The Asian Football Confederation (AFC). Loron 10-11, Maio, kongresu Fédération Internationale de Football Association (FIFA).

Loron 20 Maio sei iha kongresu ASEAN Football Federation (AFF).

(Jornalista : Manuel Pinto/Editor : Alberto Alves)

 

HUSIK IDA HATÁN