Harii Ensinu Superiór, Tenke Priense Kritériu ME

0
36

DÍLI, (ANTIL) —Individuál ka grupu eh asosiasaun ne’ebé hakarak atu loke ensinu superiór, tantu sosiál ka tékniku vokasionál presiza kumpre rekizitu walu ne’ebé mak Ministériu Edukasaun (ME) kria tiha ona.

Vise-ministru Edukasaun II, Abel da Costa Ximenes ba profisionál komunikasaun sosiál sira iha Eskola Tékniku Vokasionál (ETV), Becora, Díli, Segunda (27/2) informa, rekizitu sira ne’e mak hanesan tenke iha planu estratéjiku, tenke iha fundasaun, iha osan, iha korpu dosente, infrastrutura akadémika, laboratóriu, meza no kadeira inklui biblioteka.

Vise-ministru Abel da Costa mós informa, antes ne’e veteranu sira mai ona iha Ministériu Edukasaun dala tolu no hasoru malu ona ho ministru no ministru rasik fó ona orientasaun jerál hodi veteransu sir abele loke fundasaun, tuir mai mak hatama proposta.

“Veteranus iha disiplina, ne’ebé agora Ministériu Edukasaun fó ona orientasaun agora sira seidauk simu estudante maibé sei halo uluk preparasaun. Ne’e hatudu ezemplu di’ak ba eskola ne’ebé mak lakohi kumpre regra no lei nasaun RDTL nian,” vise ministru ne’e informa.

Nune’e mós, nia informa katak veteranu sira ne’e mós mai hasoru ona ho nia (vise-ministru II) ba dala rua no avalia hodi haree ona katak sira komesa ona trata fundasaun i komesa elabora proposta nomós komesa ona halo uma.

“Foin dadaun ha’u ba Same, ha’u haree sira-nia rai mós luan, maibé la signifika ministériu edukasaun fó orientasaun hodi fó hatene kritériu avalia sira-nia serbisu,” haktuir Vise-ministru Edukasaun II, Abel da Costa Ximenes.

Entretantu planu atu eskola liliu ensinu superiór ne’e mak veteranu sira husi rejiaun III ho IV. No eskola refere planea sei loke iha Suku Betanu, Postu Administrativu Same, Munisípiu Manufahi.

Timor-Leste hafoin restaurasaun indepedénsia iha 2002, ensinu superiór eziste dahuluk no úniku iha nasaun ne’e mak Universidade Nacional Timor Lorosa’e (UNTL). Universidade públika ne’e nu’udar transformasaun husi UNTIM (Universitas Timor Timur) bainhira Timor sei sai provínsia da-27 ba Repúblika Indonézia (RI).

Maske nune’e, bainhira konstituisaun Repúblika Demokrátika Timor-Leste (RDTL), iha artigu 59o (Edukasaun no kultura) konsagra ona katak 1) estadu rekoñese no garante sidadaun hotu nia direitu ba edukasaun no kultura, nune’e mós harii sistema ensinu báziku universál, obrigatóriu no wainhira bele, saugati, tuir lei haruka.

2) Ema hotu iha direitu hanesan, ba oportunidade atu eskola no ba formasaun serbisu/profisaun nian. 3) Estadu rekoñese no fiskaliza eskola partikulár no kooperativu sira. 4) Estadu tenki garante ba sidadaun hotu-hotu, tuir sira-nia kapasidade, atu bele hetan eskola boot kona-ba investigasaun sientífika no hamoris/haburas arte. Inklui 5) Ema hotu iha direitu atu goza no harii kultura hanesan nia obrigasaun atu haburas, defende no mós fó valór ba patrimóniu kulturál.

Tanba haree ba lejitimidade hirak ne’ebé mak konsagra iha konstituisaun ne’e, tuir mai sidadaun timoroan sira balun hahú ho inisitiva rasik no grupu eh asosiasaun komesa loke tan ona mós ensinu superiór tékniku vokasionál inklui institutu superiór privadu sira.

To’o ohin loron, alende UNTL, inklui tan ensinu superiór tékniku vokasionál inklui institutu superiór privadu sira, iha Timor-Leste nota katak iha ona ensinu superiór hamutuk 15.

Ensinu superiór sira ne’e mak hanesan UNPAZ, UNDIL, UNITAL, IOB, DIT, Institute Superiór Cristal (ISC), Institutu Superiór Canossa, Institute Superior Relijioza (ICR), Institutu Ciência da Saúde (ICS), Instituto Politecnico de Betano (IPB), Instituto Católico de Formação dos Professores (ICFP) nomós seluk tan.

Polítika asosiasaun estabelisementu ensinu superiór destaka ona iha artigu 19º lei baze edukasaun nian, lei nú.14/2008, 29 Outubru.

Órgaun ne’ebé iha kompeténsia atu halo avaliasaun ba ensinu superiór sira ne’ebé eziste iha Timor-Leste mak Agência Nacional para a Avaliação e Acreditação Académica (ANAA). Ajénsia ne’e estabelese ho dekretu governu nú. 21/2010, 1 Dezembru.

Informasaun kona-ba ANAA bele asesu mós iha link ne’e: http://www.anaaa.gov.tl/sobre-anaaa/legislacao

Jornalista: Rafy Belo / Editor: Gantry Meilana

HUSIK IDA HATÁN