Governu Sei Kria Polítika Hodi Kombate Poluisaun Bee-Ambiente

0
73
Xefe Governu, Rui Maria de Araújo, haree besik estasaun tratamentu bee iha Tibar, Sesta, (24/3). Foto GPM

LIQUISA, (TATOLI) – Ministru Obras Públikas, Transporte no Komunikasaun (MOPTK), Gastão Sousa dehan, importante atu haree definisaun polítika klaru hodi kombate poluisaun bee no ambiente liuhosi rejime kontrolu.

“Futuru ita presiza haree ba teknolojia no jestaun ne’ebé apropriadu hodi halo trartamentu ba bee fo’er no bee restu sira hodi uza hikas no responde ba nesesidade bee ne’ebé menus ba bebeik”, Gastão hatete iha ninia intervensaun ba selebrasaun loron mundiál bee iha estasaun tratamentu bee residuais Tibar, Sesta, (24/3).

Pasu importante ne’ebé MOPTK hahú dezenvolve ona dokumentu tolu kona-ba polítika saneamentu, hetan ona aprovasaun hosi governu no polítika rua hanesan nasionál ba jestaun rekursu hídrikus no abastementu bee mos iha Timor-Leste ne’ebé sei lori hodi diskute iha Konsellu Ministru semana oin mai, informa governante ne’e.

Hodi dehan tan, polítika ida ne’e, sei sai mata-dalan ba setór bee no importante ba MOPTK hodi bele tuir no rezolve situasaun bee, ohin loron iha opsaun oioin kona-ba rekolla no halo tratamentu ba bee fo’er no bee restu.

Iha fatin hanesan, Primeiru Ministru (PM), Rui Maria de Araújo, dehan, aprovasaun ba polítika saneamentu la-sufisiente, polítika hanesan matadalan atu orienta tenke iha planu implementasaun ne’ebé di’ak no investimentu finanseiru, nune’e bele sai realidade.

“Planu implementasaun, ha’u hakarak konvida kolega sira hosi diresaun nasionál água e saneamentu atu haree kestaun importante ida, koordenasaun entre sektorál”, tenik PM.

Tuir PM, bele halo kaptasaun ne’ebé fura ona, hamos ho rede distribuisaun ne’ebé mak di’ak, enkuantu manutensaun ba sistema sira la-funsiona loloos, susar tebes iha sustentablidade ba projetu ne’e.

Aproveita loron selebrasaun loron mundiál bee, PM apela ba populasaun tomak atu bele asume responsablidade ida ne’e.

Tuir nia, governu iha responsablidade lidera prosesu maibé, komunidade tomak iha responsablidade boot liu atu kontribui, nune’e implementasaun pólitika bee liu-liu bele mantein bee sira ne’ebé sai fonte bele distribui ba populasaun.

Jornalista: Julia Chatarina

Editora: Rita Almeida

HUSIK IDA HATÁN