DILI (TATOLI) – Progressu diak ne’ebe hatudu hosi instituisaun Polisia Nasional Timor-Leste (PNTL) durante tinan 17, lori xefi governu, Primeiru Ministru Rui Maria de Araujo hanoin hodi reve hikas orsamentu ba instituisaun seguransa ne’e, nune’e bele kria kondisaun diak liu tan.
ʺDurante ida ne’e PNTL hamutuk ho F-FDTL sai parte ida husi area perioridade nebe’e governu define iha area seguransa ninian tamba tinan-tinan orsamentu estadu ita aloka ba insituisaun sira ne’e no ita presiza reve fila fali apoiu hirak ne’e hodi kria kondisaun diak liutan,ʺ dehan Xefi governu iha Akademia Polisia, Comoro, Dili, Segunda (27/03/2017).
Insitituisaun PNTL hamrik foin tinan 17 maibe, desemvolvimentu iha infrastutura, fasilidades no profesionalismu hahú lao diak.
ʺHusi tinan ba tinan iha progresu ba diak liutan no orientasaun ida klaru hodi profesinaliza instituisaun ne’e, maski ita rekuinese sei iha failansu maibe komando rasik no Ministeriu Interior halo ona esforsu tomak hodi resolve problema ne’e,ʺ katak PM Rui.
Jornalista: Agapito dos Santos / Editor: Gantry Meilana