Governu Klarifika Espekulasaun Relatóriu KLD

0
23

DÍLI, (ANTIL) —Governu Timor-Leste (TL) liuhusi nia portavóz, Ministru Estadu, Agio Pereira klarifika relatóriu Komisaun Likidasaun Dívida (KLD) ne’ebé fó sai husi Ajénsia Notisioza Portugal, LUSA, katak relatóriu ne’e fó sai molok governu lee no haree relatóriu nomós númeru inklui rekomendasaun ka troka informasaun sira ho KLD.

Relatóriu ne’e fó sai husi LUSA iha semana kotuk no relatóriu ne’e elabora husi Komisaun Eventuál Parlamentu Nasionál hodi halo supervizisaun no akompañamentu ba prosesu likidasaun dívida estadu nian.

“Interupsaun husi prosesu ida ne’e no informasaun ne’ebé lekar sai husi komunikasaun sosiál ne’e desesionante. Governu sei la halo espekulasaun kona-ba relatóriu ne’ebé seida’uk bele iha biban hodi haree hikas no fó atensaun tomak ne’ebé merese bainhira simu relatóriu ne’e ho formál,” hateten Ministru Estadu Agio Pereira liuhusi komunikadu ne’ebé ANTIL hetan ohin, Tersa (28/2).

Iha komunikadu ne’e mós informa katak, governu liuhusi Ministériu Obras Públika, Transporte no Komunikasaun (MOPTK) haruka kópia dokumentu hirak ne’e hotu, bainhira Komisaun ne’e legalmente hetan pose no inklui mós iha mandatu komisaun ne’e nian.

Alende ne’e, governu esklarese liuhusi Ministru Obras Públika, Transporte no Komunikasaun, Gastão de Sousa no Vise-ministru Finansa, Helder Lopes inklui dirijente Administrasaun públika nian.

Komisaun Likidasaun Dívida harii iha 2016 ho rezolusaun husi Parlamentu Nasionál nú. 12/2016, 10 Agostu 2016.

Komisaun ne’e harii atu akompaña no fiskaliza prosesu apuramentu dívida iha tinan kotuk nian hodi selu iha ámbitu programa investimentu nian inklui orsamentu retifikativu ba 2016, identifika risku sira ne’ebé envolvidu iha jestaun projetu no kontratu sira ne’ebé lori ba situasaun kustu adisionál sira iha projetu no obra sira inklui programa fundu infrastrutura nian ne’ebé realiza iha 2016.

Ikus liu, propoen ba Plenáriu Parlamentu Nasionál medida nesesária sira hodi asesgura tuir lei, nu’udar rezultadu verifikasaun husi prosesu kompensasaun no likidasaun dívida ne’ebé sei hala’o husi governu.

Komisaun Likidasaun Dívida termina nia mandatu iha 31 Janeiru 2017.  Bele asesu mós iha link ne’e: http://timor-leste.gov.tl/?p=17449&lang=pt

Jornalista: Rafy Belo

HUSIK IDA HATÁN