Estudante KomSos Hametin Amizade ho Reflesaun

0
44

DILI, (ANTIL) – Tempu kuaresma, estudante no alumni departementu Komunikasaun Sosiál, Universidade Nasionál Timor Lorosa’e (UNTL), organiza malu hodi hametin amizade no fraternidade liuhusi reflesaun hamutuk.

Foto espesiál
Foto espesiál

Atividade ne’ebé hala’o iha tasi ibun Bidau Santana, foin lalais ne’e hanesan aktu karidade no jestu ida hodi kontribui ba dame, tan dame eziste tanba iha domin.

Tuir sagrada eskritura (Mateus, 5:9), rahun di’ak ba sira ne’ebé lori dame, tanba sira mak sei temi nu’udar Maromak nia oan loloos. Katak, hadame ita-nia aan, ho ita-nia belun eh família liuhusi dalan dame hodi buka lia loos ba moris, isin no klamar nian.

Nune’e mós, hadook ita aan husi buat ne’ebé aat no buka halo buat ne’ebé di’ak, buka dame no halo esforsu hodi hetan dame (Mazmur, 34:37) atu nune’e bele halo ema hotu moris hakmatek hodi hala’o moris hodi sustenta família no bele kontribui ba prosperiedade no moris di’ak nasaun nian.

“Amizade ne’e importante tanba halo ita sai família maske ita husi munisípiu ne’ebé la hanesan”, estudante finalista, Salustiano Ribeiro hatete.

Papa Francisco nia liafuan iha tempu hanoin Jesus nia terus, ita presiza jejun liafuan negativa sira hodi hateten liafuan di’ak nian, halo jejun ba deskontentamentu hakonu fali ho larak luak eh gratidaun nian, jejun ita-nia aan husi hirus hodi ense fali banati ho pasiénsia nomós ita presiza jejun ita-nia aan husi pesimista ba fali esperansa no optimista nian.

Tuir karta pastorál eleisaun 2017 ne’ebé fó sai husi dioseze Baucau, Díli no Maliana, foin lalais ne’e, konvida sidadaun atu halo buat hotu ne’ebé depende ba kapasidade nu’udar ema.

Karta ne’e hetan asinatura husi Prezidente  da Conferência Episcopal Timorense (CET), Bispo Don Basílio do Nascimento, Pro-presidente CET, Bispo Don Virgílio do Carmo nomós Secretário CET, Bispo Don Norberto Amaral. (jornalista: Rafy Belo; editora: Rita Almeida)

HUSIK IDA HATÁN