Embaixadora EUA Inaugura EP-Manleuana

0
61
Embaixadora Karen Stanton bainhira ku’a fita, iha atividade inagurasaun sala foun haat iha Eskola Primária (EP)-Manleuna, Díli, Kuarta (22/03). Foto Media EUA

DÍLI, (TATOLI)– Embaixadora Estadus Unidus Amérika (EUA) ba Timor-Leste, Karen Stanton hamutuk ho ofisiál eskola no F-FDTL inaugura sala foun haat iha Eskola Primária (EP)-Manleuna, Díli, Kuarta (22/03/2017).

Estudante Eskola Primária (EP)-Manleuna bainhira partisipa iha atividade inagurasaun. Foto: Media EUA.

Tuir komunikadu ne’ebé TATOLI hetan,  Sesta (24/03/2017) katak sala ne’e konstrui husi Unidade Forsa Navál Estadus Unidus iha Timor-Leste parseria ho Unidade enjeñaria F-FDTL nian husi fulan Novembru 2016 to’o Marsu 2017.

Durante fulan neen nia laran, Seabees kompleta ona konstrusaun ba klínika iha Metinaro, Eskola Primária Vemasse, Postu Administrativu Vemasse, Munisípiu Baucau no klínika ida iha Manatuto.

Dezde ninia operasaun hahú iha Timor-Leste iha tinan 2009, Forsa Navál Estadus Unidus Seabees kompleta ona projetu konstrusaun liu 100 iha nasaun ne’e, inklui projetu bo’ot 50 ne’ebé kompletamente finansia husi governu EUA.

Projetu sira ne’e inklui ponte, eskola 37, postu saúde 13 no sentru komunidade neen iha munisípiu hitu iha teritóriu Timor-Leste.

Jornalista: Rafy Belo / Editor: Gantry Meilana

HUSIK IDA HATÁN