Eleisaun Prezidensiál : Gráfika Nasionál Imprime Buletim Votu 800.000

0
21

ANTIL – Eleisaun prezidensiál ne’ebé sei monu iha 20 Marsu, gráfika nasionál imprimi buletim votu hamutuk 800.000 (Rihun Atus Ualu).

“Gráfika nasionál hahú imprime buletim votus iha 1 Marsu no sei remata iha 13 Marsu ho totál 800.000 tuir dadus ne’ebé entrega hosi STAE” informa Diretór Gráfika Nasionál, Jaime Fernando dos Mártires C. Correia ba ANTIL iha nia servisu fatin, Colmera, Kuarta (01/03)

Tuir Diretór Nasionál Gráfika, buletim votu sei entrega ba Sekretariadu Tékniku Administrasaun Eleitórál (STAE) hodi halo distribuisaun ba sentru votasaun hotu iha Timor-Leste.

Buletim votu ba kandidatu kompletu ho fotografia, emblema no númeru sekuénsia. Hosi prosesu imprime ne’e, oras ida sei imprime buletim votu hamutuk 8.000 (Rihun Ualu)

Konaba prosesu imprime ne’e, Diretór Nasionál Gráfika hateten, imprime buletim hahú hosi sapa hafoin ba imprime iha makina, wainhira sapa prontu ona entaun tau ona iha makina atu haree rezultadu imprime orijinál.

“Makina iha kondisaun di’ak atu imprime buletim votu “ami iha akordu ho kompañia indonezia atu haruka sira nia tékniku hodi bele halo manutensaun no sira tenke iha fatin atu bele antisipa fallansu ruma ne’ebé mak akontese iha ámbitu impresaun” Diretór Nasionál Gráfika akresenta

Totál eleitór ne’ebé sei partisipa iha eleisaun prezidensiál iha 20 Marsu hamutuk 748 mill resin maibé imprime buletim votu aumenta pursentu 5 ou 6 ho razaun atu antisipa eleitór sira ne’ebé vota sala maibé hakarak troka buletim hodi hadia no fallansu sira seluk tan. (Jornalista : Zezito Silva/Alberto Alves )

HUSIK IDA HATÁN