Ekipa FMSS Empata ho F.C Fight Arena

0
43
Bandeira ekipa FC.FMCS

DÍLI, (TATOLI)—Jogu Futsal (Futebol Salaun) entre adversáriu rua, grupu mane husi Fakuldade Siénsia Medisina no Saúde (FMSS), Universidade Nacional Timor-Lorosa’e hasoru FC. Fight Arena, Bebora remata ho golu sanulu resin haat, enkuantu FC. Fight Arena, Bebora konsege tiru borus guarda rede ekipa FMSS nian ho golu hitu.

Ekipa Futsal Mane, FMSS. Foto: FMSS

Nune’e mós, ekipa FMSS la fila ho liman mamuk maibé konsege suta hikas golu hitu ba F.C Fight Arena Bebora. Ikus mai grupu rua hakarak ka lakohi tenke empata, iha Kampu Futsal, Bebora, Díli, Kuarta (29/03).

Molok 90 minutu ikus, bainhira apitu lian, jogu kontra atake entre ekipa foinsa’e rua maka’as tebes, ida-idak ho nia tékniku no esforsu atu tenta lori vitória ba ida-idak nia ekipa. Maske nune’e, esperansa la sai realidade. Hakarak ka lakohi tenke empata bainhira arbitru hu apitu lian ikus.

Ba Ajénsia Tatoli, prezidente ekipa FMSS, UNTL, Adão do Carmo hateten katak maske nia ekipa tenke fila ho rezultadu empata maibé iha jogu tuir mai sira sei buka atu lori rezultadu diak ba sira-nia ekipa.

Nia haktuir, teknikamente, ekipa FMSS la konsege lori vitória ba sira-nia fakuldade tanba jogadór sira sei falta komunikasaun liliu bainhira lori bola atu ba hatama iha guarda rede ekipa adversáriu nian.

Seluk, ekipa ne’e la konsege fó ksolok ba nia adeptu sira tanba molok ba hasoru ekipa husi Bebora, Díli ne’e, jogadór sira halo treinu ladauk efetivu hodi nune’e difikulta sira hodi bele produz golu barak liutan hasoru ekipa adversáriu.

Razaun ida tan, ekipa FMSS ne’e la konsege ultrapasa bola husi guarda-rede F.C Fight Arena barak liu tanba jogadór prinsipál barak husi sira-nia ekipa dadaun ne’e barak mak sei estájiu hela iha ospitál.

Maske nune’e, mezmu ho falta jogadór prinsipál, sira sempre iha hanoin ida katak “Vitória” mak nu’udar rezultadu ikus. Tanba ne’e, bainhira jogu, tuir Adão do Carmo, sira la lori “Karon mamuk” ka derota.

Ho fallansu tékniku no komunikasaun ne’ebé iha, prezidente ekipa FMSS ne’e, sei buka atu hadi’a di’ak liutan hodi nune’e bele susesu iha jogu tuir mai liliu hadi’a tékniku no komunikasaun ne’e.

Ekipa Futsal mane, FMSS ne’e sei hasoru rival foun rua iha jogu tuir mai, Sexta (7/03) no Tersa (4/03), tuku 18.00 loraik Oras Timor-Leste (OTL) iha kampu hanesan.

(Jornalista:Rafy Belo/Editor : Alberto Alves)

 

 

HUSIK IDA HATÁN