DILI, (ANTIL) – Empreza 3A Timor S.A submete ona dokumentu ba Banku Sentrál Timor-Leste (BSTL) iha Sesta (3/3). Daudaun ne’e halo hela revizaun ba dokumentu iha loron 45 atu haree no sei notifika iha loron 60 hodi foti desizaun.
“Karik dokumentu ne’e kompletu ona, ami sei notifika ba sira para hahú halo revizaun ba sira-nia aplikasaun”, Nur Alkatiri, Vise-Governadora, BSTL ba ANTIL, Segunda ne’e iha avenida Francisco Vaxier do Amaral, Akait-Dili.
Rafael Borges, Xefe Divizaun Regulamentu no Lisensiamnetu BSTL hatete, atu harii edifísu empreza 3A Timor S.A ne’e, lisensa preliminár BSTL sei observa edifísu ne’ebé sei estabelese banku maibé momentu ne’e sei iha prosesu avaliasaun ba dokumentu no seidauk observa fatin atu harii edifísiu refere.
Atubele hetan lisesiamentu, BSTL informa ba empreza bazeia ba rekezitu tomak ne’ebé banku estabelese tanba desizaun husi BSTL hasai bazeia ba dokumentu bainhira empreza ne’e prinxe rekezitu.
Rekezitu ne’e mak haree liubá kestaun kapasidade finanseiru husi na’in sira. “Tuir sira-nia kapasidade finanseiru atu tau rekezitu mínimu ba kapitál, depois iha futuru sé banku ne’e presiza ka’er adisionál kapitál karik oinsá sósiu sira sei tau osan ne’e, depois osan ne’e rasik mai husi fonte ne’ebé?”, Rafael haktenik.
“Haree mós kestaun planu negósiu ne’ebé empreza aprezenta planu tuir duni kondisaun Timor-Leste nian ne’e razoavel ka ka’e? Depois kestaun administradór sira sei hala’o atividade bankária iha Timór”.
Bainhira BSTL haree dokumentu empreza 3A Timor S.A no prienxe rekezitu preliminára, sei iha tinan ida atu halo preparasaun, prosesu rejistu iha SERVE. Hanaran empreza ne’e banku, BSTL mak tenke hasai autorizasaun naran ba banku nian bainhira prienxe rekezitu hafoin halo ajustamentu iha SERVE, loke banku.
Atu selu administrasaun ba prosesu aplikasaun banku nian ho montante mil USD $25.000 BSTL hahú halo prosesa iha loron 45 no fó notifikasaun katak aplikasaun ne’e kompletu ona ka la’e.
“Bainhira aplikasaun ne’e la-kompletu karik Banku Sentrál sei fó tempu ba sira para prienxe sira-nia rekezitu entaun Banku Sentrál iha loron 60 atu foti desizaun”, esplika.
Lei ne’ebé aplika ba empreza sira maka regulamentu númeru 8/2000, lei United Nations Transitional Administration in East Timor (UNTAET) kona-ba lisensiamentu no supervizaun bankária, lei ne’ebé sei aplika atu regulariza atividade bankária iha Timor-Leste. (jornalista: Maria Auxiliadora; editora: Rita Almeida)