Académica FC Optimista Manán SLB

0
103
Ekipa Académica FC

DILI, (TATOLI) – Treinadór Académica FC, Fernando Xavier Baptista optimista, ninia ekipa sei manán ekipa AD SLB Laulara iha jogu jornada haat Liga Futeból Amadora (LFA) ne’ebé sei hala’o iha Estádiu Munisipál Baucau, Sábadu (25/3).

“Hafoin jogu maka ita foin haree ninia rezultadu no ami iha tarjetu para hetan pontus 3 iha jogu ida ne’e,” Fernando ba Ajénsia Tatoli via telefónema bainhira viajen hela hosi Dili ba Munisípiu Baucau, Sesta ne’e.

Tuir nia haree, ekipa SLB no ekipa en-jerál ne’ebé maka kompete iha primeira divizaun Liga Futeból Amadora (LFA), laiha diferensa boot. Hotu-hotu kuaze forsa hanesan, maske provizoriamente SLB lidera hela jogu ne’e.

“Ami preparadu intermus fízikamente no mentál atu hasoru AD SLB”, tenik. Kona-ba adeptus, Fernando subliña, laiha dúvidas. Jogu iha Baucau rame no tribun sempre nakonu hela de’it ho adeptu sira.

Iha jogu jornada tolu liu-ba, Académica manán dala ida no impata dala rua. Manán Zebra FC 3-0 iha Estádiu Munisipál Maliana (5 Marsu 2017), impata ho Cacusan 1-1 iha Estádiu Maliana (25 Fevereiru 2017) no impata 1-1 ho Carsae FC iha Estádiu Maliana (11 Marsu 2017). Ohin, ekipa Académica aranka ona ba Baucau.

Jornalista: Xisto Freitas

Editora: Rita Almeida

HUSIK IDA HATÁN