BAUCAU, (TATOLI)—Prezidente eleitu iha eleisaun prezidensiál, 20 Marsu 2017 mak eis-gerilleiru, Francisco Guterres, Lú Olo tanba hetan votus maioria kompara ho kandidatu timoroan na´in ualu seluk.
Foinsa´e sira sujere atu prezidente eleitu hodi bele kumpre programa ne´ebé aprezenta durante kampaña.
“Koopera di´ak ho povu no liliu joventude sira atu nune´e bele serbisu hamutuk ba dezenvolvimentu hodi la´o susesu iha futuru,” hateten Valdemar Pascoal, nu´udar joven ida, iha nia hela fatin, Wainiki-Bahú, Baucau ba Ajénsia Tatoli, Domingu (26/03).
Prezidente Repúblika (PR) hala´o kna´ar tuir konstituisaun no halo tratamentu ka atendementu hanesan ba sidadaun hotu.
Tan PR nu´udar xefe estadu, símbolu no garantia independénsia nasionál no unidade Estadu nian, no instituisaun demokrátika sira-nia funsionamentu regulár.
“Labele halo diskriminasaun ba povu no partidu polítiku,” nia sujere tanba konsidera Timor-Leste ida de´it.
PR nu´udar símbolu unidade nasionál konsagra iha konstituisaun Repúblika Demokrátika Timor-Leste (RDTL), artigu 74º.
Haree ba programa ne´ebé aprezenta durante kampaña, joven ne´e hateten katak, ba joven sira importante mak kampu traballu.
Kria fatin formasaun ba joven sira hanesan inglés, portugés no seluk tan. Nune´e mós ba povu sira, importante mak kondisaun estrada di´ak, asesu ba eletrisidade, bee moos, edukasaun no seluk tan.
Tan povu nu´udar sidadaun kumpre ona nia dever, tuir ona votasaun no durante votasaun povu liliu joven sira koopera di´ak ho parte seguransa, Polísia Nasionál Timor-Leste (PNTL) hodi fasilita eleisaun la´o ho hakmatek.
“Joven kumpre ona nia dever ida,” nia hateten, hatutan mós katak, “joven sira hahú iha ona konsiénsia”.
Dezenvolvimentu la´o bainhira povu, estadu no governu serbisu hamutuk, tuir idaidak nia kompeténsia. “Importante buat sira hotu hala´o,” nia konklui.
Arsenio Filipe, joven ida husi Suku Tirilolo, Munisípiu Baucau kongratula eis-gerilleiru ne´ebé eleitu ona hodi sai xefe estadu.
Afirma mós katak PR ne´ebé povu hili ona, bele halo tuir programa ne´ebé hato´o ona ba povu sira iha kampaña.
Eis-prezidente Asembleia Konstituante ne´e eleitu hodi bele sai nu´udar PR ho rezultadu votus hamutuk pursentu 57,1 husi 696 sentru votasaun sira iha Timor-Leste.
(Jornalista: Rafy Belo)
