Xanana Apoiu Lu-Olo ho Fuan

0
52

DILI (ANTIL)— Kandidatu Prezidenti Repúblika periodu 2017-2022, Francisco Guterres Lu-Olo kansidera katak Eis Komandante Rezisténsia, Kay-Rala Xanana Gusmão apoiu ninia kandidatura ho fuan.

“Ne´e sentimentu ida lori tinan naruk ne´ebé ami kuda hamutuk durante funu naruk ida nia laran. Tanba ne´e maka nia uza ninia fuan hodi apoiu ha´u nia kandidatura. Ha´u ko´alia de´it ida ne´e. Iha tempu seluk ha´u hakarak atu hato´o ha´u nia liafuan espesiál ba Xanana rasik,” Lu-Olo dehan kestaun ne´e ba jornalista sira iha sede Komité Sentrál FRETILIN (CCF), Comoro, Dili, Tersa (31/01/2017).

Lu-Olo haktuir apoiu ne´ebé maka Xanana no veteranu sira fó ba ninia kandidatura ne´e la liuhusi akordu ruma.  “En-prinsípu, ha´u laiha akordu ho ha´u nia Maun Xanana no ha´u nia alin veteranu sira. Komprimísiu maka ami tenki hamutuk fila fali para dezenvolve ita nia rain,” Lu-Olo tenik.

Nia fiar iha ema hotu-hotu liu-liu veteranu sira no partidu ki´ik sira nia votus atu lori nia hetan vitória iha eleisaun prezidensiál. “Ne´e la´ós katak Maun Xanana apoiu ha´u ne´ebé ha´u manán loos de´it ona. Lae. Ha´u mós hatene katak Maun Xanana mós sei submete ba votu populár ninian. Maibé, ha´u rai apoiu hosi Maun Xanana no veteranu sira iha ha´u nia fuan,” Lu-Olo afirma. Iha 3 Fevereiru mai ne´e, Lu-Olo sei lori ninia kandidatura ba rejistu iha Tribunál Rekursu.

Antes ne´e, iha Aeruportu Internasionál Prezidenti Nicolau Lobato, Dili, Ministru Planeamentu Estratéjiku no Eis Líder Rezisténsia, Xanana Gusmão deklara katak, pesoalmente, nia apoiu Lu-Olo ba Prezidenti Repúblika. 

Jornalista: Xisto Freitas / Editor: Gantry Meilana

HUSIK IDA HATÁN