Veteranu Munisípiu 4 Apoia Lu-Olo ba Prezidenti Repúblika

0
65

DILI (ANTIL)—Veteranu sira kuaze ema na´in ruanulu hosi munisípiu haat (4) maka hanesan Ainaro, Ermera, Liquiça no Aileu deklara apoia kandidatu Francisco Guterres Lu-Olo ba Presidente da Republika periodu 2017-2022.

Veteranu hirak ne´e deklara sira nia apoiu ne´e iha sede Komité Sentrál FRETILIN (CCF), Comoro, Dili, Tersa-feira ne´e. Grupu veteranu ne´e lidera hosi veteranu no eis Majór Augusto de Araújo Tara no Saudozu Komandante Venâncio Ferraz nia oan feto, Prisca de Araújo.

Veteranu Augusto Tara informa, momentu ida ne´e momentu ida ne´ebé Lu-Olo nian atu sai prezidenti repúblika, tanba ne´e, veteranu sira hosi munisípiu haat ne´ebé temi iha leten no munisípiu sira seluk hanesan Bobonaro, Covalima no Same fó apoiu tomak ba Lu-Olo.

“Úniku kandidatu Lu-Olo maka ho antesedénsia veteranu, tanba ne´e ami fó apoiu tomak ba nia (Lu-Olo) sai prezidenti atu bele hadi’a povu nia moris,” nia dehan.

Foto hamutuk entre veteranu sira ho Kandidatu Francisco Guterres Lu-Olo. Foto ANTIL/Xisto Freitas
Foto hamutuk entre veteranu sira ho Kandidatu Francisco Guterres Lu-Olo. Foto ANTIL/Xisto Freitas

Iha fatin hanesan, Prisca de Araújo, Saudozu Venâncio Ferraz nia oan feto deklara katak sira fó apoiu ho neon no laran tomak ba Lu-Olo atu sai prezidenti repúblika tanba Lu-Olo nu´udar veteranu ne´ebé fó nia vida ba funu iha ailaran durante tinan 24. Nia tenik jerasaun foun seidauk bele hetan oportunidade atu lidera rai ida ne’e tanba sei dúvida ho kapasidade.

“Bainhira veteranu sira sei moris no sei forte hela, ami kontinua fó fiar ba sira atu lidera nasaun ida ne´e.  Jerasaun foun sira seidauk bele. Veteranu sira de’it maka oras ne´e lidera nasaun karik sei iha problema, satán jerasaun foun. Ita atu lori nasaun ba ne´ebé,” Prisca afirma.

Nia husu ba Lu-Olo atu vizita saudozu sira nia família hodi rona sira nia hanoin bainhira eleitu ba prezidenti repúblika. Husu mós ba Lu-Olo atu foti desizaun ruma karik tenki rona órgaun soberania sira seluk nia ideia no tenki rona mós veteranu sira.  “Ami husu mós ba Ita-Boot (Lu-Olo) katak iha komemorasaun loron nasionál, keta haluha temi saudozu sira ne´ebé lakon sira nia vida iha funu. Basá, durante ne´e, líder sira haluha temi sira nia naran,” Prisca sujere.

Iha biban ne´e, Kandidatu Francisco Guterres Lu-Olo konsidera katak deklarasaun apoiu ne’ebé tatoli hosi maluk veteranu sira no família saudozu ne´e  nu´udar  sentimentu ida hosi sofrimentu funu naruk nian. Tan ne´e, nia apresia tebes apoiu refere.

“Hanesan eis gerileiru, ha´u sei la permite atu povu ida ne´e terus nafatin.  Sé uluk ita luta maka´as atu kore án hosi terus, maibé to´o ukun án sei terus nafatin, ida ne’e ita la hakarak,” atuál Prezidenti FRETILJN informa.

Lu-Olo promete katak nia sei rona parte hotu-hotu inklui família saudozu no líder sira seluk hanesan Marí Alkatiri, Xanana Gusmão, Ramos Horta, Lere Anan Timur no Taur Matan Ruak ho objetivu hakarak serbisu hamutuk ba Timor nia di´ak. (Jornalista:  Xisto Freitas/Editor : Alberto Alves)

HUSIK IDA HATÁN