TL Loke Ona Embaixada Foun Haat iha ASEAN

0
114

DÍLI, (ANTIL) -Oras ne’e daudaun Governu Timor-Leste (TL) hein nafatin desizaun finál husi membru ASEAN (Association of South East Asean Nation) sira kona-ba adezaun Timor-Leste ba organizasaun Aziátika  ida ne’e, Governu liuhusi Ministériu Negósius Estranjeirus no Kooperasaun (MNEK), estabelese tan ona embaixada iha nasaun haat membru organizasaun ne’e nian.

“Ita kontinua reforsa relasaun bilaterál sira no kooperasaun ho país ASEAN nian sira no ita loke ona embaixada foun haat iha La’os, Camboja, Myanmar no Brunei,” informa Primeiru-Ministru, Rui Maria de Araújo, ba jornalista sira, iha Palásiu  Governu, foin lalais ne’e.

Nasaun haat ne’e nu’udar membru ativu husi nasaun membru organizasaun Áziatika seluk hanesan Tailándia, Vietnam, Indonézia, Singapura, Filipina no Malázia.

Embaixadór sira ne’ebé destakadu ona iha nasaun haat ne’e mak hanesan Marçal Avelino Ximenes, iha Brunei Darusalam, Pascoela Barreto Guterres, iha iha Vietnam, Maria Natalia Viegas Carrascalão iha La’os no seluk tan.

Embaixadór hirak ne’e fó tomada de posse diretamente husi Xefe Estadu, Taur Matan Ruak, iha Palásiu Prezidensiál, Díli, 15 Dezembru 2016.

Nune’e mós, Xefe Governu informa katak, Governu mós reforsa fila fali kooperasaun bilaterál iha área justisa nian, hodi adopta protokolu hirak jerál ho Portugal, Cabo Verde no Moçambique.

Seluk tan mak eis-ministru saúde iha Primeiru Governu Konstitusionál ne’e informa, kona-ba Governu Timor-Leste hala’o ona forum ekonómiku globál dahuluk CPLP nian, ne’ebé halibur delegasaun husi nasaun liu 20 hodi fó oportunidade hirak reál ba país CPLP nian atu dezenvolve sira-nia negósiu iha rejiaun Ázia Pasifíku.

(Jornalista: Rafy Belo/Editor : Alberto Alves)

HUSIK IDA HATÁN